Հայ մտավորականության ներկայացուցիչները կոչ են անում չվախենալ օտարալեզու կրթությունից

Հայ ժողովուրդն այնքան փխրուն չէ, որ վախենա օտարալեզու դպրոցների բացումից, կարծում է հայտնի հայ ճարտարապետ Լևոն Իգիթյանը:

«Լեզվի մասին» և «Հանրակրթության մասին» օրենքում փոփոխություններ և լրացումներ կատարելու մասին օրինագիծը նախատեսում է Հայաստանի դպրոցներում օտարալեզու ուսուցման ներդրումը բուհական համակարգում արդեն գործող նույնատիպ կրթության նմանությամբ:

Փոփոխությունները երկրում հասարակական լայն արձագանք ստացան: Մի շարք քաղաքական ուժեր և հասարակական կազմակերպություններ կտրականապես դեմ են օրինագծին՝ հայտարարելով, որ այն կարող է վնասել ազգային ինքնությանը: Այժմ օրինագիծը ներառված է խորհրդարանի հունիսի 7-10-ը անցկացվելիք նիստերի օրակարգում:

Իգիթյանի խոսքերով՝ բարձրացված աղմուկը նույնիսկ վիրավորական է հայ ժողովրդի համար: «Մենք հնագույն, այլ ոչ թե հին և հիվանդ ժողովուրդ ենք: Մենք ամուր ազգ ենք, և հասկանալի չէ, թե ինչից ենք վախենում, մենք այդքան էլ փխրուն չենք, որպեսզվի վախենանք ընդամենը 15 օտարալեզու դպրոցների բացումից», - չորեքշաբթի լրագրողներին ասաց Իգիթյանը:

Նրա խոսքերով՝ չարժե զգուշանալ «աշխարհի առջև դռները բացելուց»: Ճարտարապետը կարծում է, որ ամուր փակված դռների դեպքում կարող է փտման վտանգ առաջանալ:

Մեծանուն հայ դիրիժոր Օհան Դուրյանի որդին՝ Նարեկ Դուրյանն իր հերթին չափազանցված է համարում օտարալեզու դպրոցների բացման հետ կապված վտանգը: Նա նշեց, որ մեծ քանակությամբ նմանատիպ դպրոցներ գործում են Փարիզում:

Դուրյանի խոսքերով՝ այստեղ գլխավոր հարցը օտարալեզու դպրոցների գործունեությունն արգելելը չէ, այլ հայկական դպրոցներում ուսուցման մակարդակի բարձրացումն է:

«Իմ հայրն ուսանել է արաբական դպրոցում, տիրապետում է 11 լեզվի, սակայն ոչ ոք չի կարող կասկածի տակ դնել նրա հայրենասիրությունը», - ասաց նա:-0-