Ղարաբաղյան կարգավորման գործընթացում անթույլատրելի են միակողմանի զիջումները. ընդդիմություն

Ղարաբաղյան կարգավորման գործընթացում միակողմանի զիջումներն անթույլատրելի են, այդ կարծիքին է  ժողովրդական կուսակցության նախագահ Ստեփան Դեմիրճյանը։

«Մեր մոտեցումը հստակ է՝ ոչ մի միակղոմանի զիջում։ Դրանց մասին խոսելն ավելորդ է»,- չորեքշաբթի լրագրողներին ասաց նա։

Լրագրողներին այն հարցին, թե ինչ է նա հասկանում փոխադարձ, այլ ոչ թե միակողմանի զիջումներ ասելիս, ի պատասխան Դեմիրճյանն ասաց, որ պետք է հարգել Ղարաբաղի ինքնակողմնորոշման իրավունքը՝ ուժի կիրառման բացառման հիման վրա։

«Մնացածը, այդ թվում փոխադարձ զիջումների թեման, բանակցությունների հարց է»,- ասաց նա։

Միաժամանակ ՀԺԿ ղեկավարը միտք հայտնեց, որ հակամարտության կարգավորման գործընթացի սխալը թույլ է տրվել այն ժամանակ, երբ Հայաստանը բանակցային գործընթացում փոխարինեց Ղարաբաղին։

«Ցավոք, վարվող քաղաքականությունը հանգեցրեց նրան, որ մեկը մյուսի հետեևից հայկական կողմի համար անբարենպաստ բանաձևեր են ընդունվում»,- պարզաբանեց Դեմիրճյանը։

Եվրախորհրդարանը մայիսի 20-ին բանաձև է ընդունել Հարավային Կովկասում հակամարտությունների կարգավորման վերաբերյալ, որը պատրաստել է բուլղարացի խորհրդարանական Եվգենի Կիրիլովը։ Փաստաթղթում ասվում է, որ Ղարաբաղը պետք է ուժերը դուրս բերի «Ադրբեջանի բոլոր բռնազավթված տարածքներից»։

Դեմիրճյանը կարծում է, որ սա Հայաստանի համար հերթական անբարենպաստ բանաձևն է, և վատ չէր լինի, եթե նման բանաձևերն ընդունվեին հանուն Հայաստանի բարեկեցության։

«Նման բանաձևերը միջազգային հանրակության կարծիքն են ձևավավորում, որը, ցավոք, Հայաստանի համար բարենպաստ չէ»,- պարզաբանեց նա։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-