Հայաստանին արդար ընտրություններ են անհրաժեշտ. ընդդիմադիր կուսակցության առաջնորդ
Հայաստանում անհրաժեշտ է ազնիվ և արդար համահանրապետական ընտրություններ անցկացնել, ասաց Հայ ազգային կոնգրեսի կազմի մեջ մտնող, Ժողովրդական կուսակցության նախագահ Ստեփան Դեմիրճյանը։
«Եթե չեն անցկացվեն արդար և ազնիվ ընտրություններ, ապա դա տապալում է նշանակում երկրի համար։ Ընտրությունների անցկացումն անհրաժեշտ է մեր երկրի ապագայի համար»,- չորեքշաբթի լրագրողներին ասաց նա։
Դեմիրճյանը նշեց, որ Հայաստանում անհրաժետշ է առողջացնել բարոյա-հոգեբանական մթնոլորտը, և առանց ընտրությունների արագ կազմակերպման որևէ առաջընթացի մասին խոսել չի կարելի։
Այդ ընտրություններին ՀԺԿ հնարավոր մասնակցության ձևաչափի մասին խոսելիս նա նշեց, որ կուսակցությունը միշտ համախմբման կողմնակից է եղել, և տրամաբանական կլինի ընտրությունների ժամանակ ևս ուժերի համախմբումը։
«Ընտրություններին կարելի է նաև առանձին մասնակցել՝ հիմնվելով գաղափարական բազայի վրա, սակայն այսօր պայքար է գնում հանուն սահմանադրական կարգ հաստատելու, և այդ տեսակետից համախմբումը պարզապես անհրաժեշտ է»,- ասաց նա։
Միաժամանակ Դեմիրճյանն ընդգծեց, որ ընդդիմության նպատակը երկիրը «պարբերական ընտրությունների» դրության մեջ պահելը չէ։ «Պարզապես պետք է մեկընդմիշտ վերացնել ընտրությունների կեղծման ավանդույթը և նորմալ ընտրություններ անցկացնել, ինչն էլ ավանդույթ կդառնա»,- պարզաբանեց նա։
ՀԺԿ ղեկավարն այն կարծիքին է, որ ընդդիմության և իշխանության հարաբերությունները նորմալ կլինեն, եթե ընտրություններն ազնիվ և արդար անցկացվեն։
Ըստ նրա՝ կեղծված ընտրությունների բացասական հետևանքներն անհնար է չեզոքացնել ինչ-որ այլ քայլերով, այդ թվում Հանրային խորհրդի ստեղծմամբ, բացի նոր ազնիվ ընտրություններով։
«Սա ընդդիմության պահանջն է, սա համընդհանուր խնդիր է, քանի որ ժողովուրդը միշտ պայքարել է անարդարության դեմ, և հասարակությունը իշխանությանը պետք է պարտավորեցնի դրան գնալ»,- ընդգծեց Դեմիրճյանը։ -0-
