Կանադան կողմ է Հայաստանի և Թուրքիայի միջև նորմալ հարաբերությունների հաստատմանը. ԱԳՆ
Կանադան ողջունում է բոլոր այն քայլերը, որոնք Հայաստանի և Թուրքիայի միջև նորմալ հարաբերությունների հաստատման և սահմանի բացման կհանգեցնեն, երեքշաբթի ՀՀ արտգործնախարար Էդվարդ Նալբանդյանի հետ հանդիպման ժամանակ հայտնեց Կանադայի արտաքին գործերի և միջազգային առևտրի նախարար Լոուրենս Քեննոնը, հաղորդում է ԱԳՆ մամուլի ծառայությունը:
Իր հերթին Նալբանդյանը նշեց, որ հայ-թուրքական կարգավորման գործընթացը կշարժվի առաջ, երբ թուրքական կողմը պատրաստ կլինի հարգել պայմանավորվածությունները` առանց նախապայմանների վավերացնել և իրագործել ստորագրված արձանագրությունները:
Հայ-թուրքական հարաբերությունների հարցը նաև քննարկվել է ՀՀ արտաքին քաղաքական գերատեսչության ղեկավարի՝ Կանադայի խորհրդարանի հասարակության պալատի խոսնակ Պիտեր Միլլիկենոնի հետ հանդիպման ժամանակ:
Զրույցի ժամանակ Նալբանդյանը շնորհակալություն հայտնեց Կանադայի խորհրդարանի կողմից Հայոց Ցեղասպանության ճանաչման համար: --0--