Միասնական պետական քննությունները մեկնարկեցին Հայաստանում հունիսի մեկից

ԵՐԵՎԱՆ, 1 հունիսի. /Նովոստի-Արմենիա/. Հայկական դպրոցների շրջանավարտները երեքշաբթի միասնական պետական քննություններ են (ՄՊՔ) հանձնում առաջին երեք առարկաներից՝ կենսաբանություն, աշխարհագրություն և ընդհանուր պատմություն։

«Դիմորդների թիվն այս տարի փոքր-ինչ կրճատվել է նախորդ տարվա համեմատ։ Եթե նախորդ տարի մենք ունեցել ենք 19 հազար դիմորդ, ապա ներկայումս՝ 17 հազար»,- լրագրողներին հայտնեց Գնահատման և թեստավորման կենտրոնի տնօրեն Գուրգեն Խաչատրյանը Ջ.Կիրակոսյանի անվան դպրոցում քննական կենտրոն կատարած այցի ժամանակ։

Նրա խոսքերով, այսօր՝ ՄՊՔ առաջին օրը, կենսաբանություն են հանձնում շուրջ 1500 շրջանավարտներ, աշխարհագրություն՝ մոտ 300, ընդհանուր պատմություն՝ մոտ 500։

Խոսելով կազմակերպչական հարցերի մասին՝ ԳԹԿ ղեկավարը նշեց, որ դիմորդների ծնողները կարող են հետևել քննությունների ընթացքին քննական կենտրոնների նախասենյակներում տեղադրված մոնիտորներով։

«Այսօր քննության չի ներկայացել 13 դիմորդ։ Եթե նրանց բացակայության պատճառը հարգելի ճանաչվի, ապա նրանք կկարողանան հանձնել քննությունները լրացուցիչ փուլի ժամանակ»,- ասաց Խաչատրյանը։

Նա ավելացրեց, որ գնահատականները կհայտարարվեն մեկ-երկու օրվա ընթացքում, ինչից հետո անհրաժեշտության դեպքում դիմորդները կկարողանան մեկ օրվա ընթացքում բողոքարկել արդյունքները։

Կենտրոնաի տնօրենն ընդգծեց նաև, որ տվյալ պահին որևէ խախտում և բողոք չի արձանագրվել։

ՄՊՔ հիմնական փուլը Հայաստանում 2010 թվականին կշարունակվի մինչև հունիսի 23-ը՝ երկրի 38 քննական կենտրոններում։ ՄՊՔ-ին կմասնակցեն ավելի քան 17 հազար դիմորդներ Հայաստանից և Լեռնային Ղարաբաղից, ովքեր կարող են հավակնել երկու անվճար տեղերից մեկին և վեց վճարովի տեղի Հայաստանի բոլոր բուհերում։

ՄՊՔ-ները կանցնեն 10 առարկաներից՝ հայոց լեզու և գրականություն, կենսաբանություն, ընդհանուր պատմություն, աշխարհագրություն, ֆիզիկա, մաթեմատիկա, հայոց պատմություն, ռուսաց լեզու և օտար լեզու (անգլերեն, ֆրանսերեն, գերմաներեն, իսպաներեն, իտալերեն կամ պարսկերեն)։ -0-