Հայաստանը մայիսի 28-ին կտոնի Առաջին հանրապետության օրը

ԵՐԵՎԱՆ, 27 մայիսի. /Նովոստի-Արմենիա/. Մայիսի 28-ին Հայաստանում կնշվի  Առաջին հանրապետության 92-րդ տարեդարձը: Հայկական անկախ պետականությունը գոյատևեց մինչև 1920թ. դեկտեմբերի 2-ը։

Առաջին հանրապետությունը ստեղծվեց հայկական հողում գրեթե հազարամյա ազգային պետականության բացակայությունից հետո:

1918թ. մայիսի 26-ին Անդրկովկասյան սեյմի փլուզումից և Վրաստանի անկախության հռչակումից հետո Հայ հեղափոխական դաշնակցության շրջանային ժողովը Թբիլիսիի Հայկական ազգային խորհրդին հանձնեց կառավարության լիազորությունները՝ ազգային կյանքի բոլոր ոլորտներում դիկտատուրայի իրավունքով։

Մայիսի 28-ին Հայ ազգային խորհուրդը հայտարարեց Հայաստանի անկախությունը, իսկ մայիսի 29-ին ՀՅԴ Արևմտյան և Արևելյան բյուրոների նիստը անկախ Հայաստանի առաջին վարչապետ նշանակեց ճարտարապետ Հովհաննես Քաջազնունուն, իսկ Երևանն ընտրեց որպես նոր պետության մայրաքաղաք։

Ամեն տարի այդ օրը Հայաստանի բարձրագույն ղեկավարությունը՝ նախագահի և վարչապետի գլխավորությամբ, այցելում է «Սարդարապատ» հուշահամալիր, որտեղ ծաղկեպսակներ է դնում 1918թ. Սարդարապատի հերոսամարտի հերոսների հիշատակին:

1918թ. մայիսին հայ ժողովուրդը թուրք զավթիչների դեմ հերոսական հաղթանակ տարավ Սարդարապատի, Բաշ-Ապարանի և Ղարաքիլիսայի ճակատամարտերում։ Հենց այդ հաղթանակները թույլ տվեցին հայ ժողովրդին ստեղծել սեփական պետությունը:--0--