Հարավային Կովկասի վերաբերյալ Եվրախորհրդարանի՝ նախօրեին ընդունած բանաձևի դրույթները հակասում են ԵՄ դիրքորոշմանը, ասաց Հայաստանի արտգործնախարար Էդվարդ Նալբանդյանը:
Եվրախորհրդարանը մայիսի 20-ին բանաձև է ընդունել Հարավային Կովկասում հակամարտությունների կարգավորման վերաբերյալ, որը պատրաստել է բուլղարացի խորհրդարանական Եվգենի Կիրիլովը։ Փաստաթղթում ասվում է, որ Եվրոպան աշխարհաքաղաքական բարդ իրավիճակի հետ է բախվում այս տարածաշրջանի հետ իր հարաբերություններում։ Զեկույցի հեղինակը մտահոգություն է հայտնում նաև վերջերս ռազմական ծախսերի ավելացման վերաբերյալ և պահանջում է հայկական ուժերի դուրսբերում «Ադրբեջանի բոլոր բռնազավթված տարածքներից»։
«Ես հարգանքս եմ հայտնում Եվրախորհրդարանի նկատմամբ, սակայն զեկույցում առկա դրույթները ղարաբաղյան հակամարտության վերաբերյալ համահունչ չեն ոչ Մադրիդյան սկզբունքներին, ոչ Մոսկվայի հռչակագրին, ինչը հիշատակվում է հենց զեկույցում»,- ուրբաթ ճեպազրույցում հայտարարեց Նալբանդյանը։
Նախարարն ակնհայտ համարեց զեկույցի ձևակերպումներում առկա շփոթները և նշեց, որ դրա պատճառներից մեկն այն է, որ զեկուցողը երբեք չի եղել Ղարաբաղում և և տարածաշրջանում զեկույցը գրելիս ու չի խորհրդակցել ԵՄ անդամների և ԵԱՀԿ Մինսկի խմբի համանախագահների, այդ թվում՝ ֆրանսիացի համանախագահի հետ։
«Այդ պատճառով տվյալ փաստաթղթի որոշ դրույթներ հակասում են նաև Եվրամիության մոտեցումներին, որոնք բազմիցս արտահայտվել են, և ԵՄ՝ 2009 թվականի դեկտեմբերին Աթենքում արած հայտարարությանը, որն ամբողջությամբ համահունչ է Հայաստանի դիրքորոշմանը»,- ասաց Նալբանդյանը։
ԵԱՀԿ 56 անդամ երկրների արտաքին գործերի նախարարները 2009 թվականի դեկտեմբերի 1-2-ին Աթենքում հայտարարություն են ընդունել ղարաբաղյան հարցով, որում առաջին անգամ ամրագրվել է ազգի ինքնորոշման իրավունքի սկզբունքը և ևս մեկ անգամ ընդգծվել է ուժի և ուժի սպառնալիքի չկիրառման սկզբունքի կարևորությունը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
