Թուրքիայի, մասնավորապես վարչապետ Ռեջեփ Թայիպ Էրդողանի կողմից ղարաբաղյան հարցի անընդհատ արծարծման պատճառով Հայաստանը դուռը շրխկացրեց, և Թուրքիան մնաց մեկուսացված:
Հայաստանի նախագահ Սերժ Սարգսյանը ապրիլի 22-ին իր հրամանագրով կասեցրել է երկրի խորհրդարանում հայ-թուրքական արձանագրությունների վավերացման ընթացակարգը:
«Ըստ էության` Թուրքիային ասել են, որ ինքը այնտեղ անելիք չունի: Եվ Թուրքիայի վարչապետի կողմից անընդհատ այդ նույն հարցին անդրադառնալը, անընդհատ նույնը կրկնելը վերջիվերջո բերեց նրան, որ հենց Թուրքիան դուրս մղվեց այս տարածաշրջանում քաղաքակիրթ հարաբերություններ կառուցողների շրջանակից»,- ասաց Քոչարյանը Հայաստանի Հանրային հեռուստաընկերությանը տված հարցազրույցում:
Ըստ նրա՝ ղարաբաղյան խնդրի քննարկումը թուրք պաշտոնական անձանց հանդիպումների ժամանակ այլ երկրների ներկայացուցիչների հետ իսկապես տեղ է գտնում, բայց նրանք երբեք չեն ասում, իսկ ինչ են իրենց պատասխանում այդ երկրների ղեկավարները՝ Ռուսաստան, ԱՄՆ, Ֆրանսիա, Եվրամիություն, համանախագահներ:
«Չէ՞ որ նույնիսկ հրապարակավ հայտարարվել է, որ խնդիրը լուծվում է ԵԱՀԿ Մինսկի խմբի շրջանակներում... Եվ այս իրավիճակում ուղղակի զարմանալի է, ինչքան կարելի է այդ մենախոսությամբ զբաղվել: Նույնը կրկնել, երբ որ լսող չկա: Ի վերջո, չէ՞ որ դա դառնում է նույնիսկ ձանձրալի»,- ասաց Քոչարյանը:
Փոխնախարարը նշեց, որ իրականում Թուրքիան կարող էր անելիք ունենալ մի դեպքում, եթե նա դրդեր Ադրբեջանին կառուցողական լինել, այլ ոչ թե իր հայտարարություններով, ըստ էության, հրահրեր Ադրբեջանին ավելի կարծր դիրքորոշման:
«Ի դեպ, մեկ-մեկ այնպիսի տպավորություն է, որ Թուրքիային ձեռնտու չէ այդ հարցի կարգավորումը: Միգուցե այդ կրտսեր եղբոր կարգավիճակը ձեռք է տալիս Թուրքիային: Ինչո՞ւ: Որովհետև եթե հարցը լուծված է, ապա կախվածությունը էապես նվազում է: Իսկ որ երկու եղբայրների միջև հարաբերությունները այնքան էլ եղբայրական չեն, մենք դրանում համոզվեցինք նախորդ տարվա մոտավորապես այս ժամանակահատվածում, երբ Ադրբեջանը բացահայտ նեղացած կեցվածքով սկսեց «հարձակում» Թուրքիայի նկատմամբ»,- ավելացրեց Քոչարյանը:
Միաժամանակ նա նշեց, որ Ադրբեջանն այդպես է վարվում բոլոր երկրների նկատմամբ, և վերջին ժամանակներս թիրախ է դարձել Ամերիկայի Միացյալ Նահանգները։
«Դա մի բանի մասին է խոսում: Եթե երկիրը անընդհատ բոլորից նեղացած է՝ մեկ Ռուսաստանից, Մինսկի խմբից, Ամերիկայից, Թուրքիայից, ամբողջ աշխարհից, դա խոսում է այն մասին, որ այն քաղաքականությունը, որ իրենք վարում են, որն ընդամենը պրոպագանդա է, այլ ոչ թե իրական առաջընթացի ձգտում:
Դա ընդամենը ձգտում է, որ այն մեղքը, այն պատասխանատվությունը, որ իրենցն է, գցեն ուրիշի վրա: Իհարկե, այդպիսի մոտեցումով մենք առաջընթաց չենք արձանագրի: Եվ այդ ձանձրալի պնդումները, միայն մի բանի գնահատական են` Ադրբեջանի ձախողված քաղաքականության»,- ասաց Քոչարյանը: -0-
