Ադրբեջանը խեղաթյուրում է Ղարաբաղի բանակցային գործընթացը. Հայաստանի ԱԳՆ

ԵՐԵՎԱՆ, 19 մայիսի. /Նովոստի-Արմենիա/.  Ադրբեջանը խեղաթյուրում է ղարաբաղյան հիմնախնդրի կարգավորման բանակցային գործընթացը, կարծում է Հայաստանի արտաքին գործերի փոխնախարար Շավարշ Քոչարյանը:

«Մադրիդյան սկզբունքների գաղտնազերծված մասում շատ հստակ նշվում է, որ խնդիրը պետք է կարգավորվի միջազգային իրավունքի երեք նորմերի հիման վրա` ժողովրդի ինքնորոշում, տարածքային ամբողջականություն և ուժի չկիրառում: Այն, ինչ հայտարարում է Ադրբեջանը, միանշանակ հակասում է Մադրիդյան սկզբունքներին: Այնպիսի տպավորություն է, որ Բաքուն ինքն իր հետ բանակցում է, գալիս է իր համար ընդունելի ինչ-որ լուծումների և իր ցանկությունները փորձում է ներկայացնել որպես բանակցությունների արդյունք»,- ասաց Քոչարյանը Հանրային Հեռուստաընկերությանը տված հարցազրույցում:

Փոխնախարարը նշել է, որ առայսօր բանակցությունների սեղանին կա մեկ փաստաթուղթ, որը կողմերը ընդունել են որպես հիմք բանակցությունների համար` դա 2007 թ. մադրիդյան սկզբունքներն են:

«Դրանից հետո համանախագահների կողմից եղել են տարբեր առաջարկություններ, որոնք հիմնականում մերժվել են հենց Ադրբեջանի կողմից: Վերջին օրինակը դիպուկահարներին շփման գծից հետ քաշելն էր, որն Ադրբեջանը կտրականապես մերժեց»,- ասաց  նա:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից  դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի  հետևանքով երկու կողմից զոհվեց մոտավորապես 25-30 հազ մարդ և մոտ  մեկ միլիոնը ստիպված եղավ լքել  բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-