Հայաստանը կարևոր գործընկեր է հանդիսանում ԱՄՆ-ի համար. Քեյդենաու

Հայաստանը կարևոր գործընկեր է հանդիսանում Միացյալ Նահանգների համար, և ԱՄՆ վարչակազմը ակնկալում է շարունակել գործակցությունը Հայաստանի հետ, ՀՀ ԱԳՆ ղեկավար Էդվարդ Նալբանդյանի հետ հանդիպման ժամանակ ասաց ԱՄՆ Եվրոպայի և Եվրասիայի հարցերով փոխպետքարտուղարի տեղակալ Թինա Քեյդենաուն:

«ԱՄՆ-ն ակնկալում է շարունակել գործակցությունը Հայաստանի հետ տարածաշրջանում կայունության հաստատման, տնտեսական զարգացման խթանման, բարեփոխումների իրականացման ասպարեզներում»,- ուրբաթ Քեյդենաուի խոսքը մեջբերեցին ՀՀ ԱԳՆ մամուլի, տեղեկատվության և հասարակայնության հետ կապերի վարչությունից:

Ողջունելով հյուրին` Հայաստանի արտգործնախարարն ասաց, որ Հայաստանը կարևորում է Միացյալ Նահանգների հետ բազմաբովանդակ հարաբերությունների խորացումը և բարեկամական գործընկերության ու համագործակցության ամրապնդումը` ընդգծելով, որ ապրիլին ՀՀ նախագահ Սերժ Սարգսյանի այցելությունը Վաշինգտոն և հանդիպումը ԱՄՆ նախագահ Բարաք Օբամայի հետ նոր լիցք հաղորդեց երկկողմ հարաբերությունների զարգացմանը:

Էդվարդ Նալբանդյանն ու Թինա Քեյդենաուն մտքեր փոխանակեցին արցախյան հիմնախնդրի խաղաղ կարգավորման բանակցությունների վերջին զարգացումների շուրջ:

Զրուցակիցները անդրադարձան հայ-թուրքական հարաբերությունների կարգավորման գործընթացին: -0-