ԱՄՆ-ն ակնկալում է շարունակել գործակցությունը Հայաստանի հետ. Քեյդենաու
ԱՄՆ-ն ակնկալում է շարունակել գործակցությունը Հայաստանի հետ, ուրբաթ ՀՀ նախագահ ՍԵրժ Սարգսյանի և երկրի ղեկավարության հետ հանդիպման ժամանակ ասաց ԱՄՆ Եվրոպայի և Եվրասիայի հարցերով փոխպետքարտուղարի տեղակալ Թինա Քեյդենաուն, հաղորդում են ամերիկյան դեսպանատան մամուլի ծառայությունից:
«Հայաստանը կարևոր գործընկեր է հանդիսանում Միացյալ Նահանգների համար այնպիսի ոլորտներում, ինչպիսիք են միջուկային անվտանգությունն ու խաղաղապահ գործողությունները Կոսովոյում, Աֆղանստանում և Իրաքում: Մենք ակնկալում ենք շարունակել գործակցությունը Հայաստանի հետ տարածաշրջանում կայունության հաստատման, տնտեսական զարգացման խթանման, կառուցվածքային բարեփոխումների իրականացման և ժողովրդավարական գործընթացների խորացման ասպարեզներում»,- Քեյդենաուի խոսքը մեջբերեցին Հայաստանում ԱՄՆ դեսպանատան մամուլի ծառայությունից:
Այցի ընթացքում Քեյդենաուն քննարկել է ԱՄՆ-Հայաստան երկկողմ հարաբերություններին, տարածաշրջանային խնդիրներին, տնտեսական իրավիճակին, ժողովրդավարությանն ու մարդու իրավունքներին վերաբերող հարցեր:
Դեսպան Քեյդենաուն Հայաստանի և կովկասյան այլ երկրների հետ հարաբերությունների գծով անմիջական պատասխանատու պաշտոնյան է ԱՄՆ պետքարտուղարությունում: -0-
