Հանդուրժողականության մթնոլորտի զարգացման և երկխոսության մշակույթն անհրաժեշտ են ինչպես Հայաստանի ներսում, այնպես էլ տարածաշրջանում. Օմբուդսմեն
Հայաստանի մարդու իրավունքների պաշտպան Արմեն Հարությունյանը նշել է հանդուրժողականության մթնոլորտի զարգացման և երկխոսության մշակույթի ձևավորման կարևորությունն ինչպես երկրի ներսում, այնպես էլ տարածաշրջանում Եվրոպայի [խորհրդի խորհրդարանական վեհաժողովի ղեկավար Մևլյութ Չավուշօղլուի հետ հանդիպման ընթացքում:
Ինչպես հինգշաբթի «Նովոստի-Արմենիա» գործակալությանը հայտնեցին Օմբուդսմենի մամուլի ծառայությունից, հանդիպման ընթացքում զրուցակիցները քննարկել են ինչպես Հայաստանի, այնպես էլ տարածաշրջանի մարդու իրավունքների պաշտպանության մարտահրավերները:
«Հարությունյանը, կարևորելով Չավուշօղլուի պատասխանատու առաքելությունը ԵԽԽՎ-ի նախագահի պաշտոնում, ընդգծել է տարածաշրջանում համերաշխության և կայունության ապահովման կարևորությունը` որպես մարդու իրավունքների երաշխավորման կարևորագույն նախապայման»,- ասվում է հաղորդագրությունում:
Չավուշօղլուն հայտնել է, որ սա իր առաջին այցերից է անդամ երկրներ` ԵԽԽՎ նախագահի պաշտոնում ընտրվելուց հետո, և ինքն արդեն եղել է Մոլդովայում և Ադրբեջանում:
Կարևորելով Օմբուդսմենի դերը ԵԽ-ում Հայաստանի կողմից ստանձնած պարտավորությունների կատարման գործում՝ ԵԽԽՎ նախագահը կարևորել է ԵԽ Խոշտանգումների կանխարգելման կոմիտեի զեկույցի առաջարկների կատարման, ընտրական օրենսգրքի կատարելագործման, ինչպես նաև արդարադատության համակարգի բարեփոխման գործընթացները:
ԵԽԽՎ նախագահը հայտնել է, որ Թուրքիայում մոտակա ամիսների ընթացքում նախատեսվում են սահմանադրական փոփոխություններ, որոնց արդյունքում այդ երկրում կստեղծվի Օմբուդսմենի ինստիտուտ:
Եվրոպայի խորհրդի խորհրդարանական վեհաժողովի ղեկավար Մևլյութ Չավուշօղլուն երկօրյա այցով Հայաստանում է գտնվում։ Այցի շրջանակներում ԵԽԽՎ ղեկավարը հանդիպումներ է անցկացրել Հայաստանի բարձրագույն իշխանության հետ, նախատեսված են նաև հանդիպումներ խորհրդարանական խմբակցությունների անդամների, արտախորհրդարանական ընդդիմության ներկայացուցիչների հետ։ -0-
