Հայ-թուրքական արձանագրություններն արժեզրկված են Թուրքիայի մեղքով . Ցեղասպանության թանգարանի տնօրեն
Հայ-թուրքական հարաբերությունների բարելավման առաջին փուլն ավարտվել է իր բոլոր տարրերով, և այդ գործընթացը կանգնեցվել է Թուրքիայի մեղքով, հինգշաբթի մամուլի ասուլիսում ասաց Հայոց ցեղասպանության թանգարան-ինստիտուտի տնօրեն Հայկ Դեմոյանը։
«Այն, որ որոշակի լարվածություն է առաջացել թուրք-ադրբեջանական հարաբերություններում հայ-թուրքական գործընթացի ժամանակ, երկրորդական հարց է։ Հայ-թուրքական արձանագրությունների կասեցման առաջին և հիմնական պատճառը կապված է Թուրքիայի՝ Ադրբեջանը չկորցնելու նախապատվության հետ։ Երկրորդ հիմնական պատճառն այն է, որ Թուրքիայի նախնական հաշվարկները՝ գործընթացից ստանալ այն, ինչ նրանք ակնկալում էին, իրականություն չդարձան»,- ասաց Դեմոյանը։
Ըստ նրա՝ Թուրքիային չհաջողվեց հասնել Հայոց ցեղասպանության միջազգային ճանաչման դադարեցմանը և գոնե որոշ ակտիվացման կամ առաջխաղացման հասնել Ղարաբաղի հարցում, ինչը նույնպես տեղի չունեցավ այդ գործընթացի ժամանակ։
Թանգարանի տնօրենը միաժամանակ նշեց, որ, նկատի առնելով այն, որ բանակցային գործընթացի առաջին փուլը կասեցվել է Թուրքիայի մեղքով, հայ-թուրքական գործընթացի հնարավոր երկրորդ փուլի ելակետ կարող է դառնալ սահմանների բացումը։
«Եթե կցանկանա Թուրքիան առանց որևէ նախապայմանի դիվանագիտական հարաբերություններ հաստատել և բացել սահմանները, ապա կբարելավվեն հայ-թուրքական հարաբերությունները, իսկ եթե ոչ, ապա Թուրքիան կմնա մի երկիր, որը ցանկանում է ինտեգրվել Եվրոպական Միություն, բայց շարունակում է մեկուսացման մեջ պահել հարևան Հայաստանը»,- ընդգծեց Դեմոյանը։ -0-
