Ֆրանկոֆոնիայի կազմակերպությունը հայ-թուրքական հարաբերությունների կարգավորման հույս ունի
Ֆրանկոֆոնիայի Խորհրդարանական վեհաժողովի եվրոպական առաքելության ղեկավար Ժան-Պոլ Վալը հայ-թուրքական հարաբերությունների կարգավորման հույս ունի։
«Հուսով եմ, որ երկու հարևան երկրները կկարողանան հաղթահարել դժվարությունները, հայ-թուրքական հարաբերությունները կկարգավորվեն, և բոլոր արգելքները կհաղթահարվեն»,- երեքշաբթի Ֆրանկոֆոնիայի Խորհրդարանական վեհաժողովի Եվրոպական տարածաշրջանային 23-րդ համաժողովի բացման ժամանակ ասաց Վալը։
Եվրոպական առաքելության ղեկավարը նշեց, որ առանց անցյալի դասերը հաշվի առնելու չի կարելի ապագա կառուցել։ Վալը նշեց, որ Եվրոպայում լավ տեղյակ են 1915թ.-ի իրադարձությունների մասին։
Նա ավելացրեց, որ Հայոց ցեղասպանությունը ճանաչվել է նաև Եվրախորհրդի, ՄԱԿ-ի մարդու իրավունքների ենթահանձնաժողովի, աշխարհի շատ երկրների կողմից։ Դրա հետ մեկտեղ Վալն ավելացրեց, որ չնայած դրան՝ Հայաստանն ու Թուրքիան պետք է առաջ շարժվեն և կարգավորեն հարաբերությունները։
Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
