ԵՐԵՎԱՆ, 3 մայիսի. /Նովոստի-Արմենիա/. Ծաղկաձորում հուլիսի 3-5-ը նախատեսված «Արևմտահայերենի ուսուցման արդի վիճակը Սփյուռքում» գիտաժողովի անցկացման հարցերն են քննարկվել ՀՀ սփյուռքի նախարարին կից ատյանի հերթական նիստի ընթացքում:
Ինչպես «Նովոստի-Արմենիա» գործակալությանը տեղեկացրեցին ՀՀ սփյուռքի նախարարության մամուլի և հասարակության հետ կապերի վարչությունից, գիտաժողովի նպատակն է բացահայտել արևմտահայերենի ուսուցման հետ կապված հիմնախնդիրները Սփյուռքում, կառուցողական քննարկումների և վերլուծություների միջոցով գտնել դրանց լուծման ուղիներն ու միջոցները, մշակել արևմտահայերենի ուսուցման հետ կապված հիմնախնդիրների լուծմանը նպաստող ծրագրեր:
ՀՀ սփյուռքի նախարար Հրանուշ Հակոբյանի խոսքերով՝ կքննարկվեն արևմտահայերենի միասնական դասագրքի ստեղծման հնարավորությունները:
«Սփյուռքից հրավիրված և Հայաստանի լավագույն արևմտահայերենի մասնագետների համատեղ քննարկումների արդյունքում կնախանշվեն միասնական դասագրքի ստեղծման չափորոշիչները, որից հետո, հիմնվելով գլխավոր դասագրքի սկզբունքերի վրա, հայոց լեզուն կդասավանդվի` տեղայնացվելով յուրաքանչյուր տարածաշրջանում», - ասել է նա:-0-
