Միջուկային բժշկության զարգացումը Հայաստանի համար 40 միլիոն եվրո կարժենա

Հայաստանում միջուկային բժշկության զարգացման համար անհրաժեշտ է 40 միլիոն եվրո ներդնել, շաբաթ օրը մամուլի ասուլիսի ժամանակ տեղեկացրել է Ազգային մրցունակության հիմնադրամի գործադիր տնօրեն Բեկոր Փափազյանը:

Միջուկային բժշկության զարգացումը Ազգային մրցունակության հիմնադրամի ծրագրերից մեկն է, որը հիմնադրվել է 2008 թ.-ին որպես պետության և մասնավոր հատվածի միջև համագործակցության զարգացման նախաձեռնություն: Հիմնադրամի նպատակը Հայաստանի և հայկական աշխարհի մրցունակության խթանումն ու բեկումնային տնտեսական զարգացման ապահովումն է:

«Ներդրումները բավականին մեծ են, և նրանց մի մասը կներգրավվի մասնավոր ներդրողների կողմից: Ծրագրի առաջին փուլի իրագործման համար՝ Երևանի ֆիզիկայի ինստիտուտում արագացուցիչի հավաքման, տեղադրման ու գործարկման համար 8 միլիոն եվրո կներդրվի», - տեղեկացրել է Փափազյանը:

Հիմնադրամի տնօրենի խոսքերով՝ բանակցություններն արդեն ավարտվել են, և արագացուցիչների արտադրությամբ զբաղվող բելգիական ընկերության, ինչպես նաև Բելգիայի կառավարության հետ ստորագրման են պատրաստվում բոլոր անհրաժեշտ փաստաթղթերը:

Փափազյանն ավելացրել է, որ Հայաստանում արագացուցիչը հավաքելն ու բերելը, որը կօգնի արդեն վաղ ժամկետներում բացահայտել ուռուցքային  հիվանդությունները, կտևի մեկից մեկուկես տարի, իսկ արդեն երկուսուկես տարի անց կսկսվի ռադիոիզոտոպների արտադրությունը:

Նա տեղեկացրել է, որ բելգիական արագացուցիչը թույլ կտա ոչ միայն զարգացնել միջուկային բժշկությունը, այլև թույլ կտա ֆիզիկայի համար անհրաժեշտ փորձեր իրականացնել: Փափազյանը տեղեկացրել է, որ հիմնադրամը մտադիր չէ սահմանափակվել միայն մեկ արագացուցիչով և առաջիկա տասը տարվա ընթացքում ծրագրում է գործարկել ոչ թե մեկ, այլ մի քանի նման սարքավորումներ: Իսկ առաջին արագացուցիչը ծրագրվում է գործարկել մինչև 2012 թ.-ը:

Փափազյանը ընդգծել է, որ արագացուցիչի գործարկումը, ուռուցքաբանների վերապատրաստումը, ինչպես նաև բժշկության համար անհրաժեշտ իզոտոպների արտադրությունը Հայաստանը կվերածեն միջուկային բժշկության տարածաշրջանային կենտրոնի: Հիմնադրամի տնօրենի խոսքերով՝ այժմ քննարկվում է այն հարցը, թե արդյոք Երևանում միջուկային բժշկության կիրառմամբ միասնական ուռուցքաբանական կենտրո՞ն ստեղծել, թե՞ նման կենտրոններ կգործարկվեն Երևանում և Գյումրիում, իսկ բուժումը կիրականացվի տարբեր կլինիկաներում:

«Այս ամենի համար անհրաժեշտ է կապ ապահովել պետության և մասնավոր ներդրողների միջև, պարզել նրանց շահագրգռվածությունը», - ասել է Փափազյանը:-0-