Ռուսաստանը շարունակում է շահագրգռված մնալ հայ-թուրքական կարգավորման գործընթացով, ուրբաթ «Նովոստի» միջազգային մամուլի կենտրոնում տեղի ունեցած մամուլի ասուլիսի ընթացքում հայտարարեց Կովկասի Ինստիտուտի տնօրեն Ալեքսանդր Իսկանդարյանը։
Նախօրեին ՀՀ նախագահը հրամանագիր է ստորագրել հայ-թուրքական արձանագրությունների վավերացման ընթացակարգը կասեցնելու մասին և հայտարարել է՝ քանի որ ցանկանում է պահպանել հարաբերությունների կարգավորման հնարավորությունը և խաղաղություն է ցանկանում, որոշել է դեռ դուրս չգալ գործընթացից: Հայկական կողմի որոշմանն արդեն հավանություն են տվել ԱՄՆ-ն ու Ֆրանսիան:
«Կարծում եմ, որ Ռուսաստանը շարունակում է շահագրգռված մնալ գործընթացով... Ներկայում իրավիճակը տարածաշրջանում բացառիկ է, քանի որ հայ-թուրքական գործընթացում գործնականորեն առկա է ԱՄՆ-ի, Եվրոպայի և Ռուսաստանի միասնական կարծիքը՝ նրանք սահմանների բացում և դիվանագիտական հարաբերությունների բարելավում են ցանկանում»,- ասաց Իսկանդարյանը։
Նա նշեց, որ պատճառներ չի տեսնում, որոնցից ելնելով, Ռուսաստանը փոխի իր դիրքորոշումը, առավել ևս, երբ «Հայաստանի նախագահի՝ տվյալ հարցով Ռուսաստան կատարած վերջին այցի շրջանակներում, հավանաբար, նույնպես խորհրդատվություններ են անցկացվել ռուսական կողմի հետ»։
Հայաստանի նախագահ Սերժ Սարգսյանն ապրիլի 20-ին կարճատև աշխատանքային այցով Մոսկվայում էր գտնվում՝ ՌԴ նախագահ Դմիտրի Մեդվեդևի հրավերով։ Նախագահների հանդիպման ընթացքում քննարկվեցին երկու երկրների գործընկերության արդիական և միջազգային օրակարգի հարցեր։
«Կարծում եմ, որ այս առումով որևէ արմատական փոփոխություն տեղի չի ունեցել, մի այլ բան է, որ երկրները տարբեր են և ազդեցությունն էլ տարբեր է, մասնավորապես, ԱՄՆ-ն անմիջական արտահայտված ճնշում է գործադրում (Թուրքիայի վրա. «Նովոստի-Արմենիա»), Եվրոպան՝ թեթև ազդեցություն, իսկ Ռուսաստանն աշխատում է Թուրքիայի հետ էներգետիկ ոլորտում»,- ասաց Իսկանդարյանը։
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
