ԱՄՆ-ն ակնկալում է, որ Հայաստանն ու Թուրքիան կշարունակեն երկկողմ հարաբերությունների կարգավորմանն ուղղված ջանքերը. Պետդեպարտամենտ

ԵՐԵՎԱՆ, 23 ապրիլի. /Նովոստի-Արմենիա/. ԱՄՆ-ն ակնկալում է, որ Հայաստանն ու Թուրքիան կշարունակեն երկկողմ հարաբերությունների կարգավորմանն ուղղված ջանքերը: Այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Ֆիլիպ Քրոուլին՝ մեկնաբանելով Թուրքիայի հետ դիվանագիտական հարաբերությունների հաստատման արձանագրությունների վավերացման ընթացակարգը կասեցնելու մասին ՀՀ նախագահ Սերժ Սարգսյանի որոշումը:

Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանային երկու երկրների խորհրդարանների կողմից:

Ըստ դիվանագետի, ԱՄՆ-ն ելնում է նրանից, որ պաշտոնական Երևանը դուրս չի եկել Անկարայի հետ հարաբերությունների կարգավորման գործընթացից, հաղորդում են ռուսական ԶԼՄ-ները:

«Սարգսյանի հայտարարության մեջ պարզ նշվում է, որ Հայաստանը չի դադարեցնում այս գործընթացը, այլ միայն կասեցնում է այն մինչև թուրքական կողմը առաջ շարժվելու պատրաստակամություն հայտնի», - նշել է Քրոուլին: «Մենք ողջունում ենք նախագահ Սարգսյանի՝ կայունության և հաշտեցման ուղղությամբ աշխատանքը շարունակելու որոշումը»: ԱՄՆ-ն համոզված է, որ «կարգավորման գործընթացը լուրջ շահեր է բացահայտում Թուրքիայի և Հայաստանի, ինչպես նաև ողջ կովկասյան տարածաշրջանի համար»:

«Մենք կոչ ենք անելու երկու կողմերին էլ, որպեսզի նրանք դուռը բաց թողնեն՝ հաշտեցման և հարաբերությունների կարգավորմանն ուղղված ջանքերը շարունակելու համար», - ավելացրել է պետդեպարտամենտի ներկայացուցիչը:

Հայտարարելով Անկարայի հետ դիվանագիտական հարաբերությունների հաստատման արձանագրությունների վավերացման ընթացակարգը կասեցնելու որոշման մասին՝ ՀՀ նախագահ Սերժ Սարգսյանը հայտարարել է, որ «Թուրքիան պատրաստ չէ սկսված գործընթացը շարունակել և առանց նախապայմանների, արձանագ­րու­թյունների տառին համապատաս­խան քայ­լերով առաջ շարժ­վե­լ»:

Երևանում անընդունելի են համարում վերջերս թուրքական կողմի արված հայտարարությունները և մասնավորապես՝ վարչապետ Էրդողանի հայտարարությունը, որոնցում Թուրքիայի խորհրդարանի կողմից հայ-թուրքական արձանագրությունների վավերացումը հերթական անգամ կախման մեջ է դրվում Լեռնային Ղարաբաղի և Ադրբեջանի միջև հակամարտության կարգավորումից:

Ողջամիտ ժամկետները, մեր կարծիքով, ավարտվել են: «Եվ այս պահից սկսած` հարաբերությունների կարգավորման ներկա փուլը հա­մա­րում ենք սպառված», - ասել է Սարգսյանը:-0-