Կալիֆոռնիայի նահանգապետ Առնոլդ Շվարցենեգերը հայոց ցեղասպանության զոհերի հիշատակի շաբաթ է հայտարարել, ասվում է նահանգապետի գրասենյակից «Նովոստի-Արմենիա» գործակալությանը տրամադրած հաղորդագրության մեջ:
Տեղեկատվության համաձայն, ապրիլի 19-ից 26-ն ընկած ժամանակահատվածը նահանգապետը հայտարարել է «հայոց ցեղասպանության զոհերի հիշատակի օրեր»:
«Կարևոր է հիշել անցյալի սարսափները, որպեսզի պատմությունը հեռու պահել կրկնությունից: Հայոց ցեղասպանությունը մարդու իրավունքների սարսափելի խախտում էր և մի իրադարձություն, որը ցնցեց աշխարհը: 1915-1923 թվականներին մեկուկես միլիոն հայ սպանվեց Օսմանյան կայսրության ձեռքերով, ավելի քան 500 հազարը վտարվեց»,- ասվում է նահանգապետի ուղերձում:
Նա նաև նշել է, որ «այսօր Կալիֆոռնիան պատիվ ունի Հայաստանի սահմաններից դուրս հայկական սփյուռքի ամենամեծ տունը համարվելու»:
«Սա բարգավաճող համայնք է, անգամ ծայրահեղ անարդարության դեմ հայ ժողովրդի վճռականության և ապրելու հպարտ հիշեցում»,- ասել է նահանգապետը:
Նա նաև նշել է հայոց ցեղասպանության մասին իրազեկության աստիճանի բարձրացման և անմեղ զոհերին նվիրված միջոցառումներին մասնակցելու անհրաժեշտությունը:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։ Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:-0-
