Ապրիլի 24-ին ԱՄՆ նախագահ Բարաք Օբաման չի արտասանի «ցեղասպանություն» բառը, կարծում է հայ թուրքագետ Արտակ Շաքարյանը։
«Հնարավոր է, որ նա նորից հնչեցնի «Մեծ Եղեռն» տերմինը»,- չորեքշաբթի «Նովոստի» միջազգային մամուլի կենտրոնում ասաց նա։
Ապրիլի 24-ին (Հայոց ցեղասպանության զոհերին հիշատակին նվիրված օրը) հայ ժողովրդին ուղղված ուղերձում 2009թ.-ին ԱՄՆ նախագահ Բարաք Օբաման չարտասանեց «ցեղասպանություն» բառը։ Դրա փոխարեն նա օգտագործեց «Մեծ Եղեռն» արտահայտությունը. հենց այդպես են Հայաստանում անվանում 1915-1923թթ.-ի Ցեղասպանությունը։
ՀՀ նախագահ Սերժ Սարգսյանի և Թուրքիայի վարչապետ Ռեջեփ Թայիփ Էրդողանի վաշինգտոնյան հանդիպման պատճառների մասին խոսելիս՝ Շաքարյանը ասաց , որ ԱՄՆ վարչակազմն այն կազմակերպել է, որպեսզի հնարավորություն ունենա ապրիլի 24-ին հայտարարելու, որ հայ-թուրքական հարաբերությունները նորմալ են ընթանում,և չնայած անհարթ հարցերի առկայությանը, բանակցություններն առաջ են ընթանում։
Սարգսյան-Էրդողան հանդիպումը տեղի է ունեցել ապրիլի 12-ին Վաշինգտոնում միջուկային անվտանգության գագաթնաժողովի շրջանակներում։
«ԱՄՆ-ի դիրքորոշումը կայանում է նրանում, որ ցեղասպանության բանաձևի ընդունումն ու ապրիլի 24-ին «ցեղասպանություն» բառն արտասանելը կարող է խոչընդոտել առաջ ընթացքին»,- ասաց նա։
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։ Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
