Դաշնակցությունը դժգոհ է Հայաստանի արտաքին քաղաքականությունից և կշարունակի պահանջել ՀՀ արտգործնախարարի հրաժարականը
ԵՐԵՎԱՆ, 14 ապրիլի. /Նովոստի-Արմենիա/. «Դաշնակցություն» ընդդիմադիր կուսակցությունը շարունակում է դժգոհել Հայաստանի արտաքին քաղաքականությորնից և կշարունակի պահանջել ՀՀ արտգործնախարարի հրաժարականը, տեղեկացրեց ՀՀ ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը:
«Հայաստանի արտաքին քաղաքականության վերաբերյալ մեր դիրքորոշումն անփոփոխ է մնացել... Մենք դժգոհ ենք ՀՀ արտգործնախարարության աշխատանքից, որը վարում է սպասողական և լռելյայն քաղաքականություն», - չորեքշաբթի մամուլի ասուլիսի ժամանակ ասաց Կարապետյանը:
Դաշնակցությունը 2009 թ.-ի կեսերից պահանջում է ՀՀ ԱԳ նախարար Էդվարդ Նալբանդյանի հրաժարականը՝ հայ-թուրքական գործընթացի կապակցությամբ երկրի արտաքին քաղաքականության մեջ ձևավորված բացասական հետևանքների չեզոքացման համար:
«Տպավորություն է ստեղծվում, թե իշխող քաղաքական ուժն ու Հայաստանի արտգործնախարարությունը սեփական դիրքորոշումն արտահայտելու համար պարզապես սպասում են, թե ինչ կասի երկրի նախագահը այս կամ այն հարցի վերաբերյալ», - հայտարարեց Կարապետյանը:
Ինչպես հիշեցրեց պատգամավորը, հայերին վտարելու մասին Թուրքիայի վարչապետի հայտարարությունից հետո Հայաստանի արտգործնախարարությունը մեկուկես օրվա ընթացքում պաշտոնական դիրքորոշում չէր արտահայտում: Ինչպես նշեց Կարապետյանը, ՀՀ արտգործնախարարության արձագանքը հետևեց միայն երկրի խորհրդարանում վարչապետ Տիգրան Սարգսյանի ելույթից հետո:
Թուրքիայի վարչապետ Ռեջեփ Թայիպ Էրդողանը BBC հեռուստաընկերությանը տված հարցազրույցում սպառնացել է արտաքսել Թուրքիայի տարածքում անօրինական բնակվող բոլոր հայերին։ Ըստ նրա, ներկայում Թուրքիայում բնակվում է շուրջ 170 հազար մարդ, որոնցից միայն 70 հազարն են Թուրքիայի քաղաքացիներ։ Դրան ի պատասխան՝ ՀՀ վարչապետ Տիգրան Սարգսյանը հայտարարել է, որ նման քաղաքականությունը Հայաստանին հիշեցնում է 1915 թ.-ի Հայոց ցեղասպանության իրադարձությունները:
Կարապետյանն ընդգծեց, որ Հայաստանի արտգործնախարարությունը պետք է ավելի ակտիվ լինի և որպես օրինակ բերել է Թուրքիայի արտգործնախարարության և նախարար Ահմեդ Դավութօղլուի ակտիվ գործողությունները:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:-0-
