Հայ-թուրքական գործընթացի շարունակությունը աղետ կդառնա Հայաստանի համար. փորձագետ
ԵՐԵՎԱՆ, 12 ապրիլի. /Նովոստի-Արմենիա/. Հայ-թուրքական գործընթացի շարունակությունը աղետ կդառնա Հայաստանի համար, կարծում է քաղաքական գիտությունների դոկտոր, «Արարատ» ռազմավարական հետազոտությունների կենտրոնի տնօրեն Արմեն Այվազյանը։
«Եթե հայ-թուրքական գործընթացը չդադարեցվի, այն Հայաստանի համար կարող է աղետ դառնալ։ Չի կարելի հարաբերություններ հաստատել մի երկրի հետ, որը թշնամաբար է տրամադրված Հայաստանի նկատմամբ և միայն վատն է կամենում»,- ասաց Այվազյանը Մամուլի ազգային ակումբում երկուշաբթի կայացած մամուլի ասուլիսի ընթացքում։
Ըստ նրա, հայ-թուրքական գործընթացը Հայաստանին արդեն մեծ վնաս է հասցրել։ Ինչպես կարծում է Այվազյանը, այդ գործընթացի արդյունքում խորը պառակտում է առաջացել հայ ժողովրդի տարբեր շերտերի միջև. ինչպես երկրում, այնպես էլ սփյուռքում, հասարակության և իշխանությունների բևեռացում, բավական լարված իրավիճակ է ձևավորվել։ Ինչպես հայտնեց քաղաքագետը, հայ-թուրքական գործընթացը հայ հասարակության մեջ անպաշտպան լինելու զգացումներ է հանգեցրել, իսկ Թուրքիան Հայաստանի վրա ազդեցության լրացուցիչ լծակներ է ձեռք բերել։
Այվազյանն ավելացրեց, որ Ադրբեջանը, տեսնելով Հայաստանի վատթարացող վիճակն, ուժեղացրեց իր դիրքերը ղարաբաղյան հակամարտությունում և արդեն հանդես է գալիս գրոհողի դիրքերից։ Կենտրոնի տնօրենի կարծիքով, Թուրքիան հասավ հայ-թուրքական արձանագրություններում նախապայմանի ընդգրկմանը, թեև Հայաստանի իշխանությունները հակառակն են պնդում։ Փորձագետն ասաց, որ որպես նախապայման արձանագրություններում ընդգրկվել են Լեռնային Ղարաբաղի հակամարտության կարգավորումը, պատմական հարցերի ենթահանձնաժողովի ձևավորումը, ինչն անընդունելի է Հայաստանի համար։
Հայ-թուրքական երկխոսության շրջանակներում ենթադրվում է հայ-թուրքական միջխորհրդարանական հանձնաժողովի ձևավորում, որտեղ կգործի փոխըմբռնման մթնոլորտի վերականգնման ենթահանձնաժողով։
«Մենք պետք է հասկանանք, որ Թուրքիան Հայաստանի համար թշնամական երկիր է, և նրա ռազմավարության հիմքը Հայաստանի ոչնչացումն է»,- կարծում է Այվազյանը։
Փորձագետի կարծիքով, Հայաստանի իշխանություններին անհրաժեշտ է հասկանալ այդ պարզ ճշմարտությունը և չզբաղվել ինքնախաբեությամբ՝ հարաբերություններ հաստատելով Թուրքիայի հետ։
Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
