Հայաստանի Ազգային ժողովը երկրորդ և վերջնական ընթերցմամբ ընդունեց «Հայաստանի՝ 2010 թվականի պետբյուջեի մասին» օրենքի լրացումները, որոնց համաձայն՝ Հաղթանակի 65-ամյակի կապակցությամբ նախատեսվում է արտահերթ «սառեցված» խորհրդային ավանդների փոխհատուցում վճարել Հայրենական մեծ պատերազմի վետերաններին։
«Այդ նախագիծը վետերանների նկատմամբ մեր հարգանքի տուրքն է»,- ասաց Հայաստանի ֆինանսների նախարար Տիգրան Դավթյանը՝ ներկայացնելով փոփոխությունները։
Նա ավելացրեց, որ կառավարությունը նպատակահարմար է գտել պետբյուջեից լրացուցիչ միջոցներ նախատեսել այդ նպատակի համար, քանի որ պետբյուջեում արդեն կան փոխհատուցման համար նախատեսված միջոցներ և, ըստ էության, լրացումներով վետերաններին տրամադրվում է միայն արտահերթության իրավունք։
Օրինագիծն ընդունվեց միաձայն՝ ինը ձեռնպահ ձայնով։ Քվեարկությանը չմասնակցեց միայն ընդդիմադիր «Ժառանգություն» կուսակցությունը։
«Ժառանգություն» խորհրդարանական ընդդիմադիր խմբակցության ղեկավար Ստեփան Սաֆարյանն ասաց, որ իրենց խմբակցությունը ճիշտ չի համարում վետերաններին իրենց սեփական ավանդների վերադարձը հիմնավորել Հայրենական մեծ պատերազմի տարիներին նրանց սխրագործության նկատմամբ հարգանքով։
Ըստ նրա՝ ավելի նպատակահարմար կլիներ պետբյուջե լրացուցիչ միջոցների ներգրավման հաշվին իրականացնել ՀՄՊ հաղթանակի 65-ամյակի առիթով վճարումները վետերաններին։
ՀՀ կառավարությունը ծրագրում է Հայրենական մեծ մատերազմի վետերաններին «սառեցված» խորհրդային ավանդների համար մոտ 2-2,2 միլիոն դոլարի (800-900 միլիոն դրամ) փոխհատուցում վճարել: Այսօր Հայաստանում կա շուրջ 3,7 հազար վետերան:
Խորհրդային «սառեցված» ավանդների փոխհատուցումը վճարելու համար 2010 թ.-ին պետբյուջեից հատկացվել է 1,7 միլիարդ դրամ:
ՀՀ կառավարությունը 2006 թ.-ի մարտի 16-ին հաստատել է մինչև 1993 թ.-ի հունիսի 10-ը նախկին ԽՍՀՄ Խնայբանկի հանրապետական բանկում ավանդների փոխհատուցման տրամադրման կարգը, ինչպես նաև դիմումի լրացման կարգը:
Մինչև 1993 թ.-ի հունիսի 10-ը ԽՍՀՄ Խնայբանկում «սառեցված» ավանդների փոխհատուցումները տրամադրվում են միայն այն անձանց, ովքեր 2005 թ.-ի հուլիսի 1-ից մինչև 2006 թ.-ի ապրիլի 1-ը ներառվել են նպաստ ստացող ընտանիքների ցանկերում: Միաժամանակ ավանդները տրվելու են ըստ առաջնահերթության՝ կախված շահառուների՝ սոցիալական առանձին խմբերին պատկանելուց:-0-
