Հայաստանում ՃՏՊ-ի հետևանքով զոհվել է մեկ մարդ և վեցը վիրավորվել են

ՃՏՊ-ի հետևանքով Երևան-Գյումրի ավտոճանապարհի 57–րդ կմ-ում, Ներքին Բազմաբերդ գյուղի մոտ զոհվել է մեկ մարդ, վեցը վիրավորվել են, որոնց  թվում եղել են Ռուսաստանի և Վրաստանի քաղաքացիներ:

Ինչպես հաղորդում են Հանրապետության փրկարարական ծառայությունից, «Ռենջ Ռովեր» մակնիշի վրացական պետհամարանիշով մեքենան բախվել է «ԲՄՎ» մակնիշի հայկական պետհամարանիշով մեքենային, որի հետևանքով Երևանի բնակիչ Անահիտ Անդրեասյանը տեղում մահացել  է:

«Ռենջ Ռովեր» մեքենայի վարորդը` Սոչիի բնակիչ 28-ամյա Խաչատուր Նորվանդյանը և Ախալքալաքի բնակիչ 26 տարեկան Լիանա Աբաջյանը հասցվել են Թալինի հիվանդանոց:

Հրշեջ փրկարարների ջանքերով «ԲՄՎ»-ից դուրս են հանել վարորդին՝ 25-ամյա երևանցի Տիգրան Թովմասյանին, ինչպես նաև ուղևոր՝ Վայոց ձորի շրջանի Ելփին գյուղի բնակիչ 23-ամյա Կարեն Հակոբյանին, Գյումրու բնակիչ 31-ամյա Հասմիկ Պետրոսյանին և Գավառի բնակիչ 23-ամյա Հակոբ Մարուխյանին:

Տուժածները տարբեր աստիճանի վնասվածքներով հոսպիտալացվել են:

Ավելի ուշ Խաչատուր Նորվանդյանը առաջին բուժօգնություն ստանալուց հետո հիվանդանոցից դուրս է գրվել:

Տիգրան Թովմասյանին տեղափոխել են «Գրիգոր Լուսավորիչ» բժշկական կենտրոն: Նրա վիճակը գնահատվում է միջին ծանրության:

Հակոբ Մարուխյանին տեղափոխել են «Արմենիա» մայրաքաղաքային բժշկական կենտրոն, իսկ Լիանա Աբաջյանին ու Հասմիկ Պետրոսյանին՝ Երևանի «Էրեբունի» բժշկական կենտրոն: Ըստ բժիշկների, նրանք գտնվում են ծանր վիճակում: -0-