Հայաստանը բարձր մակարդակով ներառված է ֆրանկոֆոնիական երկրների ընտանիքում. ՖՄԿ գլխավոր քարտուղար

Հայաստանը բարձր մակարդակով  ներառված է ֆրանկոֆոնիական երկրների ընտանիքում և իր պարտականությունները կատարում է Ֆրանկոֆոնիայի միջազգային կազմակերպության անդամակցության շրջանակներում, ասաց ՖՄԿ գլխավոր քարտուղար Աբդու Դիուֆը  (Abdou Diouf)։

«Հայաստանը վստահ առաջ է ընթանում երկրում Ֆրանկոֆոնիա միջազգային կազմակերպության արժեքների զարգացման և ֆրանկոֆոնիայի մշակույթի ամրացման ուղով»,- ասաց Դիուֆը Հայաստանի արտգործնախարար Էդվարդ Նալբանդյանի հետ Երևանում ունեցած համատեղ մամուլի ասուլիսի ընթացքում։

Ըստ նրա՝ ի տարբերություն մյուս երկրների Հայաստանը ֆրանկոֆոնիան մի ամիս է տրամադրում,այլ ոչ թե միայն Ֆրանկոֆոնիայի միաջազգային օրը տոնում (մարտի 20)։

«2009թ.-ի տվյալներով ֆրանսերեն լեզվին նվիրված միջոցառումների մեծամասնությունը Հայաստանում են անցկացվել»,- ասաց կազմակերպության գլխավոր քարտուղարը։

Դիուֆը հուսով է, որ ՖՄԿ մյուս երկրները կհետևեն Հայաստանի օրինակին։

Նա նաև ավելացրեց, որ մտադիր է ևս մեկ անգամ այցելել Հայաստան, այս անգամ մասնավոր այցով և կնոջ ընկերակցությամբ, քանի որ «հայկական ոգուն է հաղորդակից եղել և սիրել է այս երկիրը»։

Հայաստանը Ֆրանկոֆոնիայի միջազգային կազմակերպության անդամ է դարձել 2008թ.-ին: 1970 թ.-ի մարտի 20-ին Նիգերի մայրաքաղաքում հիմնադրված Ֆրանկոֆոնիայի միջազգային կազմակերպությունն այսօրվա դրությամբ միավորում է 56 պետություն և անդամ-կառավարություններ, 14 դիտորդ-երկիր, որոնց բնակչությունը կազմում է ավելի քան 803 միլիոն մարդ:

Կազմակերպությունը ներկայացված է բոլոր հինգ մայրցամաքներում, նրա մեջ ընդգրկված են Միացյալ ազգերի կազմակերպության անդամներ հանդիսացող շուրջ մեկ երրորդ երկրները: Կազմակերպության նպատակը ֆրանսերենի տարածումն ու մշակութային բազմազանության պաշտպանությունն է:-0-