ԵՐԵՎԱՆ, 25 մարտի. /Նովոստի-Արմենիա/. Հայոց ցեղասպանության հարցի կրկնակի քննարկումը Բուլղարիայի խորհրդարանում Եվրամիության նպատակաուղղված քաղաքականության արդյունք է, կարծում է փորձագետ, Հայաստանի քաղաքական հետազոտությունների ինստիտուտի տարածաշրջանային հարցերի փորձագետ Սերգեյ Շաքարյանցը։
«Կարգ, օրենք և արդարադատություն» (RZS) բուլղարական պահպանողական կուսակցությունը երկրի խորհրդարանի քննարկմանն է ներկայացրել Թուրքիայում Հայոց ցեղասպանության դատապարտման պաշտոնական հայտարարության նախագիծ։
«Հայոց ցեղասպանության օրինագծի կրկնակի քննարկումը Բուլղարիայի խորհրդարանում հայ-թուրքական հարաբերությունների շուտափույթ բարելավումով շահագրգռված Եվրոպական Միության նպատակաուղղված քաղաքականության արդյունք է»,- հինգշաբթի մամուլի ասուլիսում ասաց Շաքարյանցը։
Ինչպես կարծում է Շաքարյանցն, այս քայլով Եվրամիությունը փորձում է ճնշում գործադրել Թուրքիայի վրա հայ-թուրքական հարաբերությունների կարգավորման հարցում։
Ըստ նրա՝ Հայաստանի համար ավելի կարևոր է Բուլղարիայի, քան Մեծ Բրիտանիայի նախաձեռնությունը, քանի որ ներկայումս մեծ է այն հավանականությունը, որ Հայոց ցեղասպանության մասին օրենքը կընդունվի Բուլղարիայում, այլ ոչ թե Բրիտանիայում։
«Բուլղարական խորհրդարանը 2010 թվականի փետրվարի 7-ին արդեն մերժել է Հայոց ցեղասպանությունը ճանաչող և դատապարտող օրինագիծը։ Եվ արդեն մարտին՝ գրեթե մեկ ամիս անց, բուլղարական խորհրդարանում պատրաստվում են քննարկել նույն օրինագիծը։ Մենք պետք է հասկանանք, որ հարցի լուծումը հենց Եվրամիությունում է»,- հավաստեց փորձագետը։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-
