Աշխարհի 60 երկրի փրկարարներ վարժանքներ կանցկացնեն Հայաստանում

Աշխարհի 60 երկիր ներկայացնող ավելի քան 1000 փրկարար Հայաստանի Կոտայքի մարզում սեպտեմբերի 11-17-ը «Հայաստան 2010» վարժանքներ կանցկացնեն՝ երկրաշարժի հետևանքների վերացման ուղղությամբ:

«Վարժանքները կազմակերպվել են ՆԱՏՕ-ի «Գործընկերություն հանուն խաղաղության» ծրագրի շրջանակներում», - լրագրողներին ասաց ՀՀ Արտակարգ իրավիճակների նախարարությանն առընթեր Փրկարար ծառայության տնօրեն Էդիկ Բարսեղյանը զորավարժությունների նախապատրաստմանը նվիրված կոնֆերանսի ժամանակ:

Նրա խոսքերով, վարժանքներն ուղղված կլինեն ավերիչ երկրաշարժերի հետևանքների վերացմանը:

«Մենք հիշում ենք 1988թ.-ի երկրաշարժը, որը 25 հազար մարդու կյանք խլեց: Այն ժամանակ երկրում չկար փրկարար ծառայություն հասկացությունը, և մենք պատրաստ չէինք դիմակայել նման աղետների: Վարժանքները նպատակաուղղված են ապագայում երկրաշարժերի նման հետևանքների կանխարգելմանը», - ասաց Բարսեղյանը:

Փրկարար ծառայության տնօրենը նշեց, որ այժմ ՀՀ կառավարությունը հատուկ ուշադրություն է դարձնում հայկական փրկարար ծառայությունները միջազգային չափորոշիչներին համապատասխանեցնելու հանգամանքին:

«Ակնհայտ է, որ այսօր մեր փրկարար ծառայությունը կանոնավոր կերպով տեխնիկապես զինվում է, բարձրացվում է կադրերի որակավորումը», - ընդգծեց Բարսեղյան:

«Հայաստանը կարևորում է նման վարժանքների անցկացումը: Մենք ձգտելու ենք անցկացնել զորավարժությունները հնարավորին չափ բարձր մակարդակի վրա», - ասաց Փրկարար ծառայության տնօրենը:-0-