Ջավախքահայերի իրավունքների պաշտպանության համակարգող խորհուրդը վրացական իշխանություններին մեղադրել է հայկական փոքրամասնության հանդեպ խտրական քաղաքականություն իրականացնելու մեջ։
Համակարգող խորհրդի կազմում ընդգրկված են «Ջավախք» հայրենակցական-բարեգործական հասարակական կազմակերպությունը, «Միտք» վերլուծական կենտրոնը, «Վիրք» կուսակցությունը, «Ջավախք» ժողովրդական շարժումը և «Երկիր» հասարակական կազմակերպությունների միությունը։
«Վրաստանի անկախացման առաջին իսկ օրերից վրացական իշխանությունները խտրական քաղաքականություն են իրականացրել երկրի հայկական փոքրամասնության հանդեպ։ Տվյալ քաղաքականության տարրերից են քաղաքական, լեզվական, կրոնական, կրթական ու մշակութային իրավունքների ոտնահարումը, Ջավախքի հայերի իրավունքների պաշտպանությամբ զբաղվող գործիչների չեզոքացումը, այդ թվում՝ ճիշման միջոցով, հայկական բնակչության ուծացման միջոցառումների իրականացումը»,- ասվում է երեքշաբթի «Նովոստի-Արմենիա» գործակալությանը տրամադրված հաղորդագրության մեջ։
«Տվյալ քայլերի արդյունքում ջավախահայերի շրջանում ավելի շատ է արմատանում վախի ու հիասթափության տրամադրությունը, ինչն իր հերթին հանգեցնում է տարածաշրջանից հայերի էմիգրացիայի տեմպերի ավելացմանը։ Տվյալ գործընթացները ավելի մեծ թափ են ստացել 2005-2006 թթ.-ից և հատկապես 2008 թ.-ի օգոստոսի հնգօրյա պատերազմից հետո»,- նշել են համակարգող խորհրդից։
Կազմակերպությունից նաև ընդգծել են, որ 2005 թ.-ից սկսած մի շարք հեղինակավոր միջազգային կառույցներ իրենց զեկույցներում և երաշխավորագրերում անդրադառնում են Վրաստանի հայկական փոքրամասնության խնդիրներին՝ կոչ անելով վրաց իշխանություններին լուծել դրանք ընդունած միջազգային պարտավորություններին համաձայն։
Համակարգող խորհուրդը հինգշաբթի Երևանում «Հայապահպանություն և Սամցխե-Ջավախք-Ծալկա» տարածաշրջանի հայերի իրավունքների պաշտպանություն» թեմայով քննարկում կանցկացնի։ -0-
