Ղարաբաղյան հակամարտության լուծումը միայն հակամարտության կողմերի ձեռքերում է, համոզված է ԵԱՀԿ գործող նախագահ, Ղազախստանի ԱԳ նախարար Կանատ Սաուդաբաևը:
«Մենք մտադիր ենք հնարավորին չափ ազդակ հաղորդել գործընթացին, սակայն միաժամանակ համոզված ենք, որ հակամարտության լուծումն այդ իրավիճակում ներգրավված կողմերի ձեռքերում է: Մնացած բոլոր մասնակիցները օգնականներ են, կողմեր, որոնք անկեղծ ցանկանում են և մտադիր են օգնել հակամարտության խաղաղ կարգավորմանը, որն անուղղելի վնաս է հասցնում ժողովուրդներին, պայմաններ չի ստեղծում տարածաշրջանի երկրների կայուն զարգացման համար: Մենք զգուշավոր լավատեսություն ունենք այդ իրավիճակի զարգացման հետագա հեռանկարների կապակցությամբ», - երեքշաբթի մամուլի ասուլիսի ժամանակ ասաց Սաուդաբաևը:
ԵԱՀԿ գործող նախագահ, Ղազախստանի ԱԳ նախարար Կանատ Սաուդաբաևը փետրվարի 14-17-ը պաշտոնական այցով կլինի Հայաստանում, Վրաստանում և Ադրբեջանում: Երկուշաբթի երկօրյա այցով Երևան ժամանած Սաուդաբաևը հանդիպում կունենա ՀՀ նախագահ Սերժ Սարգսյանի, ՀՀ ԱԺ խոսնակ Հովիկ Աբրահամյանի հետ:
ԵԱՀԿ գործող նախագահը նշեց, որ կազմակերպությունում Ղազախստանի նախագահության առաջնահերթությունների թվում կարևորագույնը ձգձգվող հակամարտությունների լուծումն է, և հենց դա է պատճառը, որ առաջին այցը Սաուդաբաևը կատարել է հենց Հարավային Կովկասի տարածաշրջան:
Ինչպես տեղեկացրեց ԵԱՀԿ նախագահը, ՀՀ ԱԳ նախարար Էդվարդ Նալբանդյանի հետ այսօր տեղի ունեցած հանդիպման ժամանակ տեղի ունեցավ կարծիքների բավականին անկեղծ փոխանակում՝ ղարաբաղյան հակամարտության կարգավորման շուրջ ստեղծված իրավիճակի կապակցությամբ:
«Ինձ համար կարևոր էր տեսնել ողջ պատկերը, գոյություն ունեցող խնդիրների ողջ շրջանակը: Ղազախստանը գիտի հակամարտության պատմությունը: Մեր նախագահ Նուրսուլթան Նազարբաևը ներգրավված է եղել հակամարտության կարգավորման գործում դեռ 1991թ.-ին, երբ նախագահ Ելցինի հետ միասին այցելել է տարածաշրջան: Այս բոլոր տարիների ընթացքում նա ուշադիր հետևել է իրավիճակի զարգացմանը», - հայտարարեց Սաուդաբաևը:
Նա նշեց, որ Ղազախստանը բացի ԵԱՀԿ-ի գծով նախորդ նախագահ-երկրների կողմից ձեռնարկված ջանքերի, ունի նաև լրացուցիչ ռեսուրսներ:
«Ես նկատի ունեմ հակամարտության պատմության գիտելիքները, որոշակի պատմական ընդհանրությունները, մտավոր մտերմությունն ու մեծ հարգանքը, որը վայելում է Ղազախստանը հակամարտության բոլոր մասնակիցների կողմից», - ասաց Սաուդաբաևը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:-0-
