Հայկական խաղաղապահ ստորաբաժանումը ժամանեց Աֆղանստան

ԵՐԵՎԱՆ, 15 փետրվարի. /Նովոստի-Արմենիա/. Աֆղանստանում Միջազգային անվտանգության աջակցության ուժերի կազմում ՆԱՏՕ-ի առաքելությանը մասնակցելու նպատակով փետրվարի 14-ին տեղակայման վայր` Կունդուզ քաղաք է ժամանել ՀՀ ԶՈւ 40 հոգանոց խաղաղապահ ստորաբաժանումը, հայտնում է Պաշտպանության նախարարության մամուլի ծառայությունը:

Հայկական զորախմբի հիմնական առաքելությունը Աֆղանստանում լինելու է գերմանական ուժերի հետ համատեղ Կունդուզի օդանավակայանի անվտանգության ապահովումը:

Ստորաբաժանումը տեղակայման վայր է մեկնել Գերմանիայից, որտեղ 2009թ. դեկտեմբերից մասնակցում էր նախատեղակայման վարժանքի:

Առաջիկա շաբաթվա ընթացքում հայկական զորախումբը զբաղված կլինի տեղակայմամբ, թիկունքային հարցերի կարգավորմամբ:

Փետրվարի 16-ին սպայակազմը կմեկնի Կունդուզի օդանավակայան` տեղանքին և կատարվելիք առաջադրանքին ծանոթանալու նպատակով:

Հայ խաղաղապահները կգործեն Աֆղանստանում գերմանական ստորաբաժանման կազմում: Խաղաղապահների հերթափոխը տեղի կունենա կես տարին մեկ անգամ:-0-