«Հետաքննող լրագրողներ» ՀԿ-ն ուսումնասիրություն է անցկացրել ու հայտնաբերել, որ Հայաստանի բնակչությունը բավարար տեղեկացված չէ հասարակական պաշտպանի ինստիտուտի մասին:
Ինչպես տեղեկատուի շնորհանդեսի ժամանակ հայտնեց ծրագրի ղեկավար Սառա Պետրոսյանը, ուսումնասիրության մեջ ներգրավվել են ՀՀ երեք մարզեր՝ Գեղարքունիքի, Կոտայքի և Արագածոտնի, և այն լույս է տեսել «Արդյունավետ հասարակական պաշտապնություն» տեղեկատուի ձևաչափում:
«Ուսումնասիրության նպատակն էր պարզել, թե ինչու է հասարակական պաշտպանի կողմից այդքան շատ մերժում այդ երեք մարզերում: Սակայն դա նաև առիթ էր ուսումնասիրելու հասարակական պաշտպանների բավականին երիտասարդ ինստիտուտը, և այն, թե ինչպես է իրականացվում բնակչության անապահով շերտերի իրավական պաշտպանությունը»,- ասաց Պետրոսյանը:
Ըստ նրա՝ ուսումնասիրությունը հայտնաբերել է քրեակատարողական օրենսգրքում փոփոխություններ կատարելու և քաղաքացիներին հասարակական պաշտպանի օգնությանը դիմելու իրավունքի տրամադրման անհրաժեշտությունը:
Նա նշեց նաև, որ, ամերիկյան փորձագետների կարծիքով, չի կարելի մարդու պաշտպանությունը տրամադրել նախնական քննություն վարող մարմինին՝ հավելելով, որ հասարակական պաշտպանի ծառայություններից հրաժարվելու քաղաքացիների մերժման մեծամասնությունը տեղի է ունենում հենց նախաքննություն ընթացքում:
Իր հերթին Հայաստանի փաստաբանների պալատի նախագահ Ռուբեն Սահակյանը հասարակական պաշտպանի ծառայություններից որպես բնակչության մերժման պատճառ բերեց նրանցից ոմանց կողմից ծառայությունների անորակ կատարումը:
Պալատի նախագահը հայտնեց, որ հասարակական պաշտպանների աշխատանքի բարելավման նպատակով սեպտեմբերին տեղի կունենա մրցույթ և իրենց պարտականությունները լավ չկատարող պաշտպանների փոխարեն հոկտեմբերին պայմանագրեր կկնքվեն նոր փաստաբանների հետ:
Սահակյանը սակայն չհամաձայնեց հասարակական պաշտպանի ծառայությունների համար դիմելու իրավունքը հենց իրենց՝ քաղաքացիներին տրամադրելու առաջարկի հետ: Ըստ նրա՝ դա կհանգեցնի նրան, որ բնակչության անապահով շերտերի փոխարեն հասրակական պաշտապններին կդիմեն նրանք, ովքեր անվճար իրավաբանական օգնության կարիք չունեն:
«Արդյունավետ հասարակական պաշտպանություն» ուսումնադիրությունն անցակցվել է «Հետաքննող լրագրողներ» հասարակական կազմակերպության կողմից Ջինիշյան հիմնադրամի, Համաշխարհային բանկի երևանյան գրասենյակի և «Քաունթերփարթ ինթերնեյշնլ» ընկերության աջակցությամբ: -0-
