ՀԱԿ-ը Հայաստանի ներկայիս իշխանությունների վարած արտաքին քաղաքականությունը ձախողված է համարում

Ընդդիմադիր ՀԱԿ-ը Հայաստանի ներկայիս իշխանությունների վարած արտաքին քաղաքականությունը ձախողված է համարում, երեքշաբթի հայտարարեց ՀԱԿ համակարգող Լևոն Զուրաբյանը:

«ՀԱԿ-ը մեկ անգամ չէ, որ հայտարարել է, որ իշխանության իրականացրած, այսպես կոչված, պրոակտիվ արտաքին քաղաքականությունը անհեռանկար է և հիմնված սխալ հաշվարիների վրա, իսկ ներքին քաղաքականության տեսակետից պարզապես հանցավոր է, քանի որ հասարակական ապատեղեկատվության և ժողովրդավարության սկզբունքների վրա ճնշում գործադրելու նպատակ է հետապնդում»,- հայտարարեց նա:   

Զուրաբյանի կարծիքով՝ իրականացված քաղաքականության արդյունքն առաջին հերթին այն հաշվարկների տապալումը եղավ, որոնց համաձայն՝ Հայաստանի վրա ճնշումը Ղարաբաղյան կարգավորման հարցում պետք է թուլանար, ավելին՝ ճնշումն ուժգնացավ:

Անկախ Հայաստանի ողջ պատմության ընթացքում առաջին անգամ Հայաստանը համաձայնեց Լեռնային Ղարաբաղի հակամարտությունը կարգավորել տարածքային ամբողջականության սկզբունքի հաշվին, ինչն, ըստ Զուրբյանի, հաստատվեց Աթենքում արված հայտարարությամբ և ամրագրվեց Սոչիում համաձայնցված Մադրիդյան սկզբունքների նախաբանում:

Այսօրվա դրությամբ, ըստ Զուրաբյանի, իշխանության իրականացրած, այսպես կոչված, պրոակտիվ քաղաքականության արդյունքում «Թուրքիան դե-ֆակտո ԵԱՀԿ ՄԽ համանախագահի կարգավիճակ է ձեռք բերել, ինչը, բնականաբար, բացասաբար կանդրադառնա Լեռնային Ղարաբաղի հակամարտության կարգավորման վրա»:

Ըստ քաղաքական գործչի՝ իշխանությունների իրականացրած արտաքին քաղաքականության հետևանքով Թուրքիան հետևողականորեն իրար է կապում հայ-թուրքական սահմանի բացումն ու Լեռնային Ղարաբաղի հակամարտության կարգավորումը, ինչի մասին ՀԱԿ-ը բազմիցս հայտարարել է: --0--