ԵՐԵՎԱՆ, 20 հունվարի. /Նովոստի-Արմենիա/. Հայաստանը ձուկ ու խեցգետին կարտահանի Ռուսաստան, չորեքշաբթի «Նովոստի» միջազգային մամուլի կենտրոնում մամուլի ասուլիսի ժամանակ ասաց Հայաստանում ՌԴ առևտրային ներկայացուցիչ Ալեքսանդր Զայցևը:
Ըստ նրա, առաջին անգամ ձկնաբուծության, խեցգետնի որսի և վերամշակման 22 հայկական ձեռնարկություններ ատեստավորվել են ռուսական Ռոսսելխոզնադզորի կողմից և թույլտվություն ստացել 2009 թ.-ի նոյեմբերի 10-ից իր արտադրանքը Ռուսաստան արտահանել:
«Առաջին մատակարարումը ծրագրվում է իրականացնել դեպի Կալինինգրադի մարզ: Ընդհանուր առմամբ, հեռանկարները մեծ են, քանի որ Ռուսաստանում հսկայական ներուժ և ձկան իրացման շուկա կա»,- ասաց Զայցևը:
Ընդ որում նա նշեց, որ 2010թ.-ին գործընթացը կշարունակվի, և Հայաստանի ևս մի քանի տասնյակ ձկնային ձեռնարկություններ կատեստավորվեն ռուսական չափանիշների համաձայն ու նրանց կթույլատրվի ձկնեղեն արտահանել Ռուսաստան:
Զայցևը նշեց, որ Հայաստանում այսօր գործում է շուրջ 200 ձեռնարկություն, որոնք զբաղվում են ձկնաբուծությամբ և խեցգետնի որսով ու վերամշակմամբ:
Նրա տվյալներով, ամեն տարի նրանք արտադրում են շուրջ 5 հազ տոննա ձկնեղեն, որից շուրջ 500 տոննան թառափն է, 500 տոննան՝ գետի իշխանը և 2 հազար տոննան ծիածանափայլ իշխանը:
«Ընդ որում ձեռնարկությունները հնարավորություն ունեն անհրաժեշտության դեպքում ավելացնելու արտադրությունը 2-2,5 անգամ»,- ասաց Զայցևը:
Նշված երկրների համապատասխան գերատեսչությունների աշխատանքի հետ ծանոթանալու նպատակով Ռոսսելխոզնադզորը 2009թ.-ին ստուգում է անցկացրել Հայաստանի՝ դեպի ՌԴ արտահանման հարցում շահագրգռված ձկնաբուծական ու ձկնամշակող ձեռնարկություններում՝ ՌԴ-ին մատակարարվող հսկվող արտադրանքի արտադրման պայմանների անվտանգության ապահովման առնչությամբ: -0-
