ԵՐԵՎԱՆ, 25 դեկտեմբերի. /Նովոստի-Արմենիա/. Սևանա լճի մակարդակը 2009թ.-ին, 2008թ.-ի համեմատ, ավելացել է 40 սմ-ով, ուրբաթ լրագրողներին հայտնեց ՀՀ բնապահպանության նախարար Արամ Հարությունյանը՝ ամփոփելով 2009թ.-ի արդյունքները:
«2009թ.-ի դեկտեմբերի 24-ի դրությամբ Սևանա լճի մակարդակը 1899,24 մետր է, այն դեպքում երբ անցյալ տարվա միևնույն ժամանակահատվածում այդ ցուցանիշը 1898,8 մետր է կազմել, ինչը խոսում է այն մասին, որ այդ տարի Սևանա ջրի մակարդակը բարձրացել է 40 սմ-ով»,- ասաց Հարությունյանը:
Ըստ նրա, Սևանա լճից ոռոգման նպատակով ջուր բաց թողնելը սկսվել է հունվարի 11-ին ու շարունակվել մինչև սեպտեմբերի 17-ը: Ընդ որում, ըստ նրա, երկրորդ անգամ ջուր է բաց թողնվել հոկտեմբերի 30-31-ին:
«Արդյունքում 2009թ.-ին ջրառի ընդհանուր թիվը 126 մլն խորանարդ մետր է կազմել, այն դեպքում երբ 2008 թ.-ին այդ թիվը 303 մլն խ/մ է եղել, ընդ որում 2008 և 2009 թթ.-ի միջև տարբերությունը 177 մլն խ/մ է»,- ընդգծեց նախարարը:
Հարությունյանը նշեց, որ տարեսկզբից մինչև դեկտեմբերի 23-ը «Արփա-Սևան» թունելով Սևանա լիճ է ներս թողնվել շուրջ 200 մլն խ/մ ջուր:
Նախարարը հայտարարեց նաև, որ տարածքների հեղեղման վնասակար ազդեցությունը կանխարգելելու նպատակով Սևանա լճի մակարդակի բարձրացման արդյունքում նախարարությունը 575 հա տարածքում անտառային տնտեսությունների մաքրման աշխատանքներ է տարել:
Միևնույն ժամանակ, Հարությունյանի խոսքերով, 2009 թ.-ին ընդհանուր առմամբ Սևանա լիճ է լցվել 287 հազար մանրաձուկ, որից 147 հազարը Գեղարքունիքի իշխան և 140 հազար ամառային իշխան:
Ընդ որում, ըստ նրա, ձկնարտադրության զարգացմանը հատկացվել է 71 մլն 502 հազար դրամ:
Միևնույն ժամանակ Հարությունյանն ասաց, որ 2009 թ.-ին Սևանա լճի անտառային տարածքի շուրջ 600 քառակուսի մետր մակերես մաքրվել է արտանետումներից:
Լրագրողների հարցին, թե նախարարությունը պայքարո՞ւմ է արդյոք ձկան որսի համար արգելված տեսակների (սիգ, իշխան) գողության դեմ, Հարությունյանը նշեց, որ դեկտեմբերին ընդունված օրենքի համաձայն պատժվում են բոլոր նրանք, ովքեր զբաղվում են ձկան ապօրինի որսով:
Սևանա լիճը խոշորագույն բարձր լեռնային լիճ է Կովկասում։ Այն գտնվում է 1900 մ բարձրության վրա, ունի 1240 քառակուսի կմ մակերես, խորությունը հասնում է մինչև 83 մետրի։ Սևանա լիճ է հոսում 28 գետ, նրանից է սկիզբ առնում Հրազդան գետը (Արաքսի վտակը)։
Սևանա լիճը խմելու ջրի միակ խոշոր երաշխավորված աղբյուրն է Հայաստանում և խոշորագույնը ողջ Կովկասում, ինչի պատճառով վաղուց հարց էր դրվել լճի ջրային պաշարների արդյունավետ օգտագործման մասին։-0-
