Հայաստանի նախագահը կարևորում է հետխորհրդային տարածքում համագործակցության խորացումը
ՀՀ նախագահ Սերժ Սարգսյանը Ալմաթիի մերձակա «Ակ բուլակ» համալիրում շաբաթ օրը տեղի ունեցած ԱՊՀ յոթ երկրների ղեկավարների ոչ պաշտոնական հանդիպման ընթացքում կարևորել է հետխորհրդային տարածքում համագործակցության և ինտեգրացիոն գործընթացների խորացումը, հաղորդում է ՀՀ նախագահի մամուլի ծառայությունը:
Փոխգործակցության հրատապ ոլորտների թվում նախագահը նշել է ռազմաքաղաքական համագործակցությունն ու կադրերի համատեղ պատրաստումը, ինչպես նաև անվտանգության միջավայրի հետագա ամրապնդումը:
«ՀՀ նախագահը կարևորել է նաև ՀԱՊԿ անդամ պետությունների միասնական արձագանքման անհրաժեշտությունը բոլոր այն պարագաներում, երբ երկրներից մեկը խախտում է միջազգային իրավունքի ընդունված նորմերը կամ կազմակերպության անդամ երկիրը շրջանցում է կազմակերպության հիմքում ընկած սկզբունքները», - ասվում է տեղեկատվության մեջ:
Սարգսյանը շնորհակալություն է հայտնել Ղազախստանի նախագահ Նուրսուլթան Նազարբաևին` գագաթնաժողովի կազմակերպման համար՝ նկատելով, որ նախորդ տարի դեկտեմբերին տեղի ունեցած նմանատիպ ոչ պաշտոնական գագաթնաժողովի ընթացքում կայացվել են մի շարք առանցքային որոշումներ` ուղղված ինտեգրացիոն գործընթացների հետագա առաջմղմանը:
Նրա խոսքերով՝ այդ որոշումները հաջողությամբ կյանքի են կոչվել 2009 թ.-ին, ադ թվում` ՀԱՊԿ Արագ արձագանքման ուժերի ստեղծումը և դրան հաջորդած զորավարժությունները, հակաճգնաժամային հիմնադրամի և տեխնոլոգիական կենտրոնի ստեղծման մասին որոշումները:
Սարգսյանը շնորհավորել է Ղազախստանի նախագահին 2010 թ. ԵԱՀԿ-ի նախագահությունը ստանձնելու կապակցությամբ՝ ընդգծելով, որ սա առաջին դեպքն է, երբ ԵԱՀԿ-ում նախագահելու է ՀԱՊԿ անդամ պետությունը:
Սարգսյանը ընդգծել է, որ Հայաստանը աջակցել է Ղազախստանի նախագահության նախաձեռնությանն այն տեսլականով, որ այն հնարավորություն կընձեռի ՀԱՊԿ անդամ պետություններին առավել լսելի դարձնելու իրենց մոտեցումներն ու փաստարկները ինչպես տարածաշրջանային, այնպես էլ գլոբալ համագործակցության, խաղաղության և անվտանգության հարցերի վերաբերյալ:
Ոչ պաշտոնական հանդիպմանը մասնակցել են Ռուսաստանի, Բելառուսի, Ղազախստանի, Հայաստանի, Ղրղզստանի, Տաջիկստանի և Թուրքմենստանի ղեկավարները:-0-
