Աֆղանստանում հայկական կոնտինգենտի ներկայությունը չի ազդի Երևանի և ՀԱՊԿ-ի հարաբերությունների վրա. Բորդյուժա

Հայաստանի որոշումը՝ հայկական ռազմական կոնտինգենտին Աֆղանստան ուղարկելու մասին, որևէ կերպ չի ազդի ՀԱՊԿ-ի հետ ունեցած դաշնակցային հարաբերությունների վրա, ասաց Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան։

«Եթե Հայաստանը որոշում է կոնտինգենտ ուղարկել Աֆղանստան, ապա համապատասխան պատճառ կա դրա համար։ Դա ոչ մի կերպ չի ազդում մեր դաշնակցային հարաբերությունների վրա»,- երեքշաբթի ասաց Բորդյուժան «ՀԱՊԿ. 2009 թվականի երկրորդ կիսամյակի գործունեության արդյունքները և 2010 թվականի հեռանկարները» թեմայով Երևան-Մոսկվա տեսակամուրջի ընթացքում։

Ինչպես ավելի վաղ հայտարարել էր ՀՀ ՊՆ նախարար Սեյրան Օհանյանը, 40 մարդուց բաղկացած հայկական խաղաղապահ կազմը Աֆղանստանում կապահովի Կունդուզի օդանավակայանի անվտանգությունը:

Հայկական կազմում կընդգրկվեն հետևակային դասակը, մեկ սպա-բժիշկ և երեք շտաբային սպաներ, որոնք կգտնվեն հյուսիսային տարածաշրջանային հրամանատարության կազմում և կապահովեն Կունդուզ քաղաքի օդանավակայանի անվտանգությունը(տաջիկստանից 40 կմ հեռավորության վրա), մասնավորապես թռիչքային դաշտի անվտանգությունը:

Բորդյուժան ոչ ճիշտ համարեց այնպիսի համակարգի ստեղծումը, որը կասեցներ Կազմակերպության որևէ անդամի ազատությունը։ «ՀԱՊԿ գլխավոր սկզբունքն է՝ կարելի է համագործակցել բոլորի հետ, այդ թվում՝ ռազմական ոլորտում և կարելի է ընդունել ցանկացած որոշումներ, որոնք չեն հակասում կամ չեն վնասում դաշնակցային պարտավորություններին»,- ընդգծեց նա։

Նշելով, որ Աֆղանստանում օպերացիայի ամենասկզբից ՀԱՊԿ-ն հայտարարել է համագործակցության անհրաժեշտության մասին, Բորդյուժան հայտարարեց, որ դեպքերի զարգացումը մեկ անգամ ևս հաստատում է, որ միայն համատեղ ուժերով և միայն դրանք համախմբելով է հնարավոր լուծել այն բարդ խնդիրները, որոնք այնտեղ ծագել են կամ գոյություն ունեն, այդ թվում, Աֆղանստանի կայունացման կամ կայուն զարգացման ապահովման ուղղությամբ։

Պատասխանելով «Նովոստի-Արմենիա» գործակալության հարցին՝ նա թվարկեց մի քանի ուղղություններ, որոնցով ՀԱՊԿ-ն այսօր կարող է աշխատել աֆղանական գոտում։

«Առաջինը թմրանյութերի անօրինական շրջանառության, աֆղանական նարկոթրաֆիկի դեմ պայքարն է։ Երկրորդն Աֆղանստանի ուժային բլոկի ձևավորումն ու կայացումն է, ես նկատի ունեմ Զինված ուժերը, ուժային կառույցները, իրավապահ մարմինները, և աջակցության ցուցաբերումը դրանց կայացման համար»,- պարզաբանեց նա։

Բորդյուժան թվարկեց նաև այնպիսի ուղղություններ, ինչպիսիք են կադրերի պատրաստումը, Աֆղանստանի տարածքում տնտեսական հարցերի լուծումը, Աֆղանստանի սահմանամերձ պետությունների, մասնավորապես, Տաջիկստանի համագործակցության կազմակերպումն ու ապահովումը, ինչպես նաև ռազմական և ոչ ռազմական բեռների տարանցիկ փոխադրումը ՀԱՊԿ անդամ-պետությունների տարածքով։

«Ահա այն հարցերը, որոնց վերաբերյալ այսօր մենք կարող ենք բացարձակապես հստակ համագործակցել, դա կբխի ինչպես ՀԱՊԿ, այնպես էլ ՆԱՏՕ-ի երկրների շահերից»,- ասաց նա։

Հայկական ռազմական կազմը Աֆղանստանում գործելու է գերմանական ռազմական ստորաբաժանման կազմում: Աֆղանստան մեկնելուց առաջ, հայ խաղաղապահները համապատասխան վերապատրաստում կանցնեն Գերմանիայում, որի ծախսերը ևս կապահովվեն գերմանացիների կողմից:

Հայ զինծառայողները հունական գումարտակի կազմում մասնակցում են Կոսովոյում խաղաղապահ առաքելությանը 2004թ.-ի փետրվարի 12-ից, իսկ Իրաքում լեհական դիվիզիայի կազմում՝ 2005թ.-ի հունվարի 25-ից։ -0-