Հայաստանն աշխարհի ամենախոցելի երկրներից է՝ բնական աղետների առումով. ՀԲ

Հայաստանն աշխարհի ամենախոցելի երկրներից է բնական աղետների սպառնալիքների տեսանկյունից, երկուշաբթի ասաց Համաշխարհային բանկի երևանյան գրասենյակի ղեկավար Արիստոմենե Վարուդակիսը Հայաստանում արտակարգ իրավիճակների կառավարման և վթարների ռիսկերի կրճատման թեմայով համաժողովում։

Նա նշեց, որ Հայաստանում գոյություն ունեն սպառնալիքների տարբեր տեսակներ, ինչը բնակչության բարձր խտության ֆոնի ներքո, հատկապես մայրաքաղաքում, հանգեցնում է առկա սպառնալիքների աճին։

«Երկրաշարժը ռիսկի միակ տեսակը չէ, որ գոյություն ունի Հայաստանում, առկա են նաև սողանքի, երաշտի և ջրհեղեղների խնդիրներ»,- ասաց Վարուդակիսը։

Տվյալ համատեքստում նա հատուկ կարևորեց ռիսկերի կառավարման անհրաժեշտությունը, ինչը հատկապես արդիական է երկրի սոցիալ-տնտեսական զարգացման տեսանկյունից, հատկապես համաշխարհային ճգնաժամի պայմաններում։

Նա նշեց, որ Համաշխարհային բանկը Հայաստանում համագործակցության և աջակցության հետևողական ծրագրեր է իրականացնում տարբեր ոլորտներում, ինչի հաշվին 2004-2008 թվականներին իրականացվել են ամբարտակների անվտանգության, ոռոգման ապահովման և այլ նախագծեր, որոնք նույնպես նպաստում են երկրում վթարների ռիսկերի կրճատմանը։

«Համաշխարհային բանկը պատրաստ է աջակցություն ցուցաբերել Հայաստանին աղետների դեմ պայքարում, ինչը թույլ կտա համապատասխան ֆինանսավորում նախատեսել պետբյուջեում, ինչպես նաև հարթակ մշակել ծախսերի առաջնահերթությունների և համակարգման որոշման առումով վթարների դիմակայության դեմ պայքարի ապահովման գործում»,- ասաց Վարուդակիսը։ -0-