Երևանում կազմակերպվող շինարարական ցուցահանդեսին թուրքական ընկերություններ կմասնակցեն

ԵՐԵՎԱՆ, 10 դեկտեմբերի./Նովոստի-Արմենիա/. LOGOS EXPO Center-ի կազմակերպած «Կովկաս Շինարարություն և Վերանորոգում 2010» ցուցահանդեսին, որը կկայանա Երևանում 2010 թ. ապրիլի 2-4-ը, կմասնակցի ավելի քան 30-ը առաջատար թուրքական շինարարական ընկերություն, «Նովոստի-Արմենիա» գործակալությանը հայտնեցին LOGOS EXPO Center-ի մամուլի ծառայությունից:

«Դա հնարավոր է դարձել LOGOS EXPO Center-ի և Թուրքիայի հանրապետության ցուցադրական ընկերություններից մեկի՝ Turkel Fair Organizations INC-ի միջև ստորագրված համաձայնագրի շնորհիվ»,- LOGOS EXPO Center կազմակերպության գլխավոր տնօրեն Սուրեն Նազինյանի խոսքերը մեջբերեցին ընկերության մամուլի ծառայությունից:

Նրա խոսքով, համաձայնագրի շրջանակներում նախատեսվում է թուրքական ընկերությունների ակտիվ մասնակցություն բոլոր այն ցուցահանդեսներին, որոնք կազմակերպում է LOGOS EXPO Center-ը, ինչը միջպետական տնտեսական հարաբերությունների զարգացման խթան է հանդիսանում:

LOGOS EXPO Center-ում կարծում են, որ վերջին ժամանակների քաղաքական ակտիվությունը՝ ուղղված Թուրքիայի և Հայաստանի միջև դիվանագիտական հարաբերությունների հաստատմանը, արդեն տալիս է տնտեսական պտուղները:

«Կովկաս Շինարարություն և Վերանորոգում 2010» ցուցահանդեսը կանցկացվի Երևանի Կ. Դեմիրճյանի անվան մարզահամերգային համալիրում: Մասնակցների թվում են Վրաստանը, Ռուսաստանը, Ուկրաինան, Իրանը:

LOGOS EXPO Center - ը առաջին մասնավոր ցուցահանդեսային ընկերությունն է Հայաստանում, որը գործում է 1999թ.-ից եւ առաջատարն է համարվում բազմաճյուղային, արդյունաբերական, տեղական եւ միջազգային ցուցահանդեսների եւ կոնգրեսների կազմակերպման գործում։

Գործունեության 10 տարվա ընթացքում LOGOS EXPO Center - ը կազմակերպել է ավելի քան 90 մասնագիտացված եւ միջազգային ցուցահանդեսներ, որոնք ներառել են տնտեսության տարբեր ոլորտները։

«LOGOS EXPO Center –ը՝ կառավարության, նախարարությունների ու տեսչությունների, դեսպանատների աջակցությամբ, ամեն տարի մինչև 15 մասնագիտացված ցուցահանդես է կազմակերպում, որոնք արտացոլում են ազգային տնտեսության դինամիկ զարգացումը»,- ասված է հաղորդագրության մեջ:--0-