ԵՐԵՎԱՆ, 7 դեկտեմբերի. /Նովոստի-Արմենիա/. Թբիլիսիի Սուրբ Գևորգ եկեղեցու վերականգնողական աշխատանքները կսկսվեն 2010 թվականի գարնանը, երկուշաբթի հայտարարեց Հայաստանի մշակույթի նախարարության պատմամշակութային ժառանգության հետազոտական կենտրոնի նախագահի տեղակալ Հովհաննես Սանամյանը։
«Համաձայն Վրաստանի մշակութային ժառանգության պահպանության ազգային գործակալության հետ ձեռք բերված պայմանավորվածության` մինչև 2009 թվականի դեկտեմբերի 20-ը Սբ.Գևորգ եկեղեցու վերականգնողական աշխատանքների էսքիզների նախագծերը կներկայացվեն Հայաստանի մշակույթի նախարարություն։ Նախագծերի քննարկումներից և հաստատումից հետո եկեղեցու վերականգնողական աշխատանքները կսկսվեն ենթադրաբար հաջորդ տարվա գարնանը»,- ասաց նա։ Փարձագետի խոսքերով` վերականգնողական աշխատանքների բոլոր ծախսերն իր վրա է վերցրել վրացական կողմը։
Ինչպես պարզաբանեց Սանամյանը, պահպանված էսքիզների շնորհիվ, որոնք կներկայացվեն ՀՀ մշակույթի նախարարւոթյուն, կհաջողվի վերականգնել եկեղեցին իր սկզբնական տեսքով։ Փորձագետը չբացառեց հայ մասնագետների մասնակցությունը վերականգնողական աշխատանքներին։
Մեկնաբանելով եկեղեցու իրավաբանական կարգավիճակի հարցը վերականգնումից հետո՝ Սանամյանը նշեց, որ տվյալ հարցը չի եղել քննարկումների առարկա, բայց ասաց, որ բոլոր պատմական հուշարձանների պահպանության և պաշտպանության համար, անկախ դրանց պատմամշակութային պատկանելությունից, պատասխանատվություն է կրում այն պետությունը, որի տարածքում այն գտնվում է։
Թբիլիսիում նոյեմբերի 19-ին փլուզվել է 1356 թ.-ին կառուցված Սբ. Գևորգ հայկական եկեղեցին: Այս առնչությամբ Հայ առաքելական եկեղեցին և մի շարք հասարակական կազմակերպություններ լուրջ քննադատություն հնչեցրեցին հայկական եկեղեցիների և մշակույթի հուշարձանների պահպանության ուղղությամբ վրացական իշխանությունների անգործության մասին:
Եկեղեցին ընդգրկված է այն հուշարձանների շարքում, որոնց ծագումը վրացական կողմը համարում է վիճահարույց, սակայն Հայաստանի համար դրանց ծագումը որևէ կասկած չի հարուցում:
Թբիլիսիում գործում է ընդամենը երկու հայկական եկեղեցի՝ Սբ. Գևորգ մայր տաճարն ու Սբ. Էջմիածինը, որոնք գտնվում է Հավլաբարի շրջանում, ևս հինգ եկեղեցի էլ, այսպես կոչված, վիճահարույց կարգավիճակում են, դրանք են՝ Կարմիր ավետարան եկեղեցին, Սբ. Մինասը, Սբ. Նշանը, Սբ. Նորաշենն ու ավերված Սբ. Գևորգը:
Սբ. Գևորգ եկեղեցին արդեն երկրորդ ավերված եկեղեցին է: 1989 թ.-ին ավերվել էր հայկական Շամխորեցոց սբ. Աստվածածին (Կարմիր ավետարան) եկեղեցին:
Վրաստանի մշակույթի նախարարության Հուշարձանների պահպանման և վերականգնման գործակալության տվյալների համաձայն, վերջին հինգ տարվա ընթացքում փորձագետների կողմից անցկացված դիտարկման շրջանակներում վերականգնվել է 300 մշակութային հուշարձան, իսկ Սբ. Գևորգ եկեղեցին չի ներառվել հեռանկարային հուշարձանների ցանկում:-0-
