Հայկական էստրադայի աստղերը նկարահանվել են անվտանգության ամրագոտիների օգտագործումը քարոզող հոլովակում
Հայկական էստրադայի աստղեր Անդրեն, Հասմիկ Կարապետյանը և Զարուհի Բաբայանը անվտանգության ամրագոտիների օգտագործումը քարոզող տեսահոլովակ են նկարահանել։
Հոլովակը պատմում է փոքրիկ աղջկա մասին, ով կորցրել է իր ծնողներին ավտովթարում՝ անվտանգության ամրագոտիները չամրացնելու պատճառով։
Ինչպես հայտարարեց Անդրեն «Նովոստի» միջազգային մամուլի կենտրոնում հրավիրված մամուլի ասուլիսի ժամանակ, հոլովակի ստեղծման նախաձեռնությունը պատկանում է «Ճանապարհային անվտանգության ազգային խորհուրդ» հասարակական կազմակերպությանը և հենց արտիստներին։
«Մենք մեր առջև խնդիր ենք դրել բարձրացնել ոչ միայն անվտանգության ամրագոտիների օգտագործման հարցն, այլ ընդհանուր առմամբ երթևեկության կանոնների պահպանմանը հարցը։ Մենք ձգտում ենք դեպի Եվրոպա, բայց չենք ցանկանում պահպանել Եվրոպայում ընդունված օրենքները»,- ասաց Անդրեն։
Անդրեն հայկական էստրադայի ամենաճանաչված արտիստներից է։ Նա առաջին անգամ ներկայացրեց Հայաստանը «Եվրատեսիլ» մրցույթում 2006 թվականին և զբաղեցրեց 8-րդ տեղը։
Երգչի կարծիքով, հայերը չեն ցանկանում օրենքներ պահպանել իրենց երկրում, սակայն արտերկրում իրենց պահում են որպես օրինապահ քաղաքացիներ։
«Մենք պետք է ինքներս մեր մեջ ներդնենք այն մշակույթն ու գիտակցումը, որ օրենքներն անհրաժեշտ է պահպանել ոչ թե այն պատճառով, որ այդպես ընդունված է, այլ այն պատճառով, որ դրանից է երբեմն կախված մեր կյանքը»,- ասաց նա։
Հայաստանի վարչական իրավախախտումների մասին Օրենսգրքում պատժամիջոցներ են սահմանված առանց անվտանգության ամրագոտիներն ամրացնելու տրանսպորտային միջոցներ վարելու համար։ Հայաստանի վարչապետ Տիգրան Սարգսյանը 2009 թվականի օգոստոսի 13-ին հանձնարարել է խստացնել Օրենսգրքի համապատասխան դրույթի պահպանման վերահսկողությունը։
Իր հերթին Զարուհի Բաբայանը նշեց, որ հոլովակի ուղերձը խոսում է այն մասին, որ թանկ է յուրաքանչյուր մարդու կյանքը։
«Մենք հույս ունենք, որ հոլովակը կցուցադրվի Հայաստանի բոլոր հեռուստաալիքներով, քանի որ սա ոչ թե այս կամ այն արտիստի հերթական հոլովակն է, այլ ունի հստակ սոցիալական ուղղվածություն»,- ասաց Բաբայանը։
Նա նաև հույս հայտնեց, որ հոլովակը համապատասխանաբար կարտացոլվի քաղաքացիների հոգիներում և կհանգեցնի անվտանգության ամրագոտիները չօգտագործելու արդյունքում ողբերգությունների թվի նվազեցմանը։ -0-
