ՀԱՊԿ-ը Կովկասի անվտանգության ապահովման կարևոր գործոնն է. ՀՀ ազգային անվտանգության խորհուրդ

Հավաքական անվտանգության պայմանագրի կազմակերպությունը Կովկասի անվտանգության ապահովման կարևոր գործոնն է, երեքշաբթի ասաց ՀՀ ազգային անվտանգության խորհրդի քարտուղար Արթուր Բաղդասարյանը:

«ՀԱՊԿ-ն այսօր համակողմանի անվտանգության և կայունության ապահովման կարևոր գործոնն է նաև կովկասյան տարածաշրջանում», - ասաց Բաղդասարյանը՝ ելույթ ունենալով «Հավաքական անվտանգության պայմանագրի կազմակերպությունը որպես Կովկասյան տարածաշրջանում կայունության և անվտանգության գործոն» թեմայով կլոր սեղանի ժամանակ:

Նա գոհունակությամբ նշեց, որ ՀԱՊԿ-ի շրջանակներում ընդունվել և իրագործվում են համապատասխան ծրագրեր՝ ուղղված անդրսահմանային կազմակերպված հանցավորության, թմրամիջոցների լայն տարածման վտանգի, ահաբեկչական վտանգի, անօրինական միգրացիայի դեմ պայքարին, ինչպես նաև տեղեկատվական անվտանգության ոլորտում մարտահրավերների հակազդմանը:

Բաղդասարյանի խոսքերով, սա արդյունավետ և անհետաձգելի որոշումներ պահանջող խնդիրների ամբողջական ցանկը չէ, և անհրաժեշտ է հետևողականորեն շարունակել և ընդլայնել այդ ուղղությամբ իրականացվող աշխատանքը:

Միջոցառմանը մասնակցում են ՀՀ Ազգային անվտանգության խորհրդի քարտուղար Արթուր Բաղդասարյանը, քաղաքագետներ, փորձագետներ, Հայաստանի քաղաքական ուսումնասիրությունների ինստիտուտների և վերլուծական կենտրոնների, ՀԱՊԿ-ի ինստիտուտի ներկայացուցիչներ, ԵԱՀԿ-ի, Եվրամիության, ՆԱՏՕ-ի և միջազգային այլ կազմակերպությունների ներկայացուցիչներ:

Կլոր սեղանի մասնակիցները կքննարկեն Կովկասում ռազմաքաղաքական իրավիճակի զարգացման կանխատեսումներն ու գնահատականները, ինչպես նաև՝ տարածաշրջանում հավաքական անվտանգության համակարգի կատարելագործման հեռանկարները և դրա հնարավորությունները՝ Հայաստանի ազգային շահերն ապահովելու գործում:

Կլոր սեղանը կազմակերպվել և անցկացվում է Հայաստանի Հանրապետության և Ռուսաստանի Դաշնության հասարակական կառույցների, ՀԱՊԿ ինստիտուտի նախաձեռնությամբ:-0-