ԵՐԵՎԱՆ, 16 նոյեմբերի. /Նովոստի-Արմենիա/. Ամենայն Հայոց Կաթողիկոսը հանդիպել է Դամասկոսի հայկական համայնքի հետ, «Նովոստի-Արմենիա» գործակալությանը տեղեկացրեցին ՀՀ ԱԳՆ մամուլի ծառայությունից:
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի գլխավորած պատվիրակությունն այցելել է Գալուստ Գյուլբենկյան առաջապահ վարժարան, ապա Ազգային միացյալ վարժարան, ուր հանդիպումներ ունեցավ վարժարանների ուսուցիչների և աշակերտների հետ:
Վարժարան այցելելուց հետո տեղի է ունեցել ժողովրդական ընդունելություն Դամասկոսի «Բաբ Թումա» հրապարակում, որտեղից Վեհափառ Հայրապետի գլխավորած պատվիրակությունը դամասկահայության ուղեկցությամբ ուղևորվել է դեպի Ս. Սարգիս Առաջնորդանիստ եկեղեցի:
Նույն օրը երեկոյան Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը հանդիպել է Ասորի Ուղղափառ եկեղեցու Պատրիարք Կաթողիկոս Զաքա Ա Իվազի հետ՝ վերջինի նստավայրում: Հանդիպման ավարտից հետո Զաքա Կաթողիկոսը կազմակերպել էր պաշտոնական ընթրիք` ի պատիվ Վեհափառ Հայրապետի:
Ամենայն Հայոց Գարեգին Երկրորդ Կաթողիկոսը Սիրիայի նախագահ Բաշար Ալ-Ասադի և երկրի հայկական համայնքի հրավերով եռօրյա այցով գտնվում է Սիրիայում:
Վեհափառ Հայրապետին ուղեկցում են Իրաքի Հայոց թեմի առաջնորդ Տ. Ավագ արքեպիսկոպոս Ասատուրյանը, Մայր Աթոռ Ս. Էջմիածնի միջեկեղեցական հարաբերությունների պատասխանատու Տ. Եզնիկ արքեպիսկոպոս Պետրոսյանը, Եգիպտոսի Հայոց թեմի առաջնորդ Տ. Աշոտ եպիսկոպոս Մնացականյանը, Մայր Աթոռ Ս. Էջմիածնի Լուսարարապետ Տ. Արարատ եպիսկոպոս Գալթագճյանը, գավազանակիր Տ. Հովնան աբեղա Հակոբյանը, Հայկական Բարեգործական Ընդհանուր Միության նախագահ Պերճ Սեդրակյանը և տիար Լևոն Սարգսյանը:
