Անվանի հայ գեղանկարիչ Մինասի աշխատանքների ցուցահանդեսնը կներկայացվի Իտալիայի մի շարք քաղաքներում 2010 թվականին

Անվանի հայ գեղանկարիչ Մինասի աշխատանքների ցուցահանդեսը կներկայացվի Իտալիայի մի շարք քաղաքներում 2010 թվականին, ուրբաթ ասաց Նեապոլի գեղեցիկ արվեստների ակադեմիայի պրոֆեսոր Ֆրանչեսկո Գալոն «Նովոստի» միջազգային մամուլի կենտրոնում։

«Ցուցահանդեսը շատ մեծ և ներկայացուցչական է լինելու, որի համար առանձնացվել է Մինասի 100 աշխատանք։ Ցուցահանդեսը կանցկացվի մեծ ցուցասրահներում, ճարտարապետական մեծ համալիրներում»,- ասաց նա։

Գալոյի խոսքերով՝ ցուցահանդեսը կանցկացվի 2010 թվականին Վենետիկում, Միլանում, Հռոմում, Ֆլորենցիայում և Նեապոլում, սակայն ներկայումս հնարավոր չէ նշել անցկացման ճշգրիտ ժամկետները։ Ինչպես պարզաբանեց պրոֆեսորը, ցուցահանդեսի նախապատրաստությունը շատ ժամանակ կպահանջի, և հենց այս պատճառով հնարավոր չէ հստակ նշել ցուցադրության ժամկետները։

Նեապոլցի մասնագետը վստահություն հայտնեց, որ Մինասի աշխատանքները հասկանալի կլինեն իտալացի արվեստասերին։ «Գեղանկարչությունը չի պահանջում մեկնաբանություններ և պարզաբանումներ, արվեստը շփման բարձրագույն միջոց է»,- ընդգծեց նա։

Ինչպես նշեց Մինաս Ավետիսյանի որդին՝ նկարիչ Նարեկ Ավետիսյանը, Ավետիսյանների ընտանիքը պատրաստ է աջակցություն ցուցաբերել Իտալիայում նախատեսվող ցուցահանդեսի անցկացմանը և մեծ հույսեր է կապում այս ցուցադրության հետ։ Միաժամանակ Ավետիսյանը նշեց, որ ցուցահանդեսի անցկացման հարցը պետք է դրվի լուրջ պետական հիմքերի վրա։  

Հայ գեղանկարիչ, գծանկարիչ, թատրոնի նկարիչ, Հայաստանի վաստակավոր նկարիչ (1968) Մինաս Ավետիսյանը ծնվել է 1928 թվականի հուլիսի 20-ին՝ Շիրակի մարզի Ջաջուռ գյուղում։

Սովորել է Թեռլեմեզյանի անվան ուսումնարանում, ավարտել է Երևանի գեղարվեստաթատերական ինստիտուտը, Լենինգրադի Ռեպինի անվան գեղանկարչության, քանդակագործության և ճարտարապետության  ինստիտուտը։

1960 թվականից ապրել է Երևանում։ Մինասի առաջին ցուցահանդեսը տեղի ունեցել 1960 թվականին, բայց նրան մեծ ճանաչում է բերել 1962 թվականին Երևանում անցկացված «Հինգ նկարիչների» ցուցահանդեսը։

1960-1975 թվականների ընթացքում Մինասը ստեղծել է 500 մեծ ու փոքր կտավներ, գրեթե նույնքան նկարներ, 20 մեծ որմնանկար ու նախագծեր՝ թատերական մեկ տասնյակից ավելի ներակայացումների համար։ Նկարիչը ողբերգական կերպով մահացել է ավտովթարից՝ 1975 թվականի փետրվարի 24-ին Երևանում։ -0-