ԵՐԵՎԱՆ, 10 նոյեմբերի. /Նովոստի-Արմենիա/. Հունգարիան Հայաստանին դիտում է որպես կարևոր գործընկեր, երկուշաբթի Բուդապեշտում իր հայ գործընկեր Սերժ Սարգսյանի հետ հանդիպման ժամանակ ասել է Հունգարիայի նախագահ Լասլո Շոյոմը:
ՀՀ նախագահը պետական այցով գտնվում է Հունգարիայում:
«Հունգարիան Հայաստանին դիտում է որպես կարևոր գործընկեր, որի հետ պատրաստ է երկկողմ ու բազմակողմ ձևաչափերում խորացնելու համագործակցությունը քաղաքական երկխոսության, առևտրատնտեսական գործակցության, հումանիտար և այլ ոլորտներում», - մեջբերել են Շոյոմի խոսքերը ՀՀ նախագահի մամուլի ծառայությունից:
Նախագահներ Սարգսյանն ու Շոյոմը վստահություն են հայտնել, որ Հայաստանի նախագահի պետական այցը նշանակալի խթան է` ակտիվացնելու հարաբերությունները երկու երկրների միջև և նշել, որ պետական այցի շրջանակում ստորագրվող փաստաթղթերը և այլ համաձայնագրերի ստորագրման ուղղությամբ տարվող աշխատանքը բավարար իրավական հիմք են ստեղծում հայ-հունգարական բարեկամական հարաբերություններն առաջ մղելու համար:
Պետությունների առաջնորդները ընդգծել են, որ չնայած վերջին շրջանում երկու երկրների միջև առկա քաղաքական երկխոսության նկատելի դինամիզմին, առևտրատնտեսական փոխգործակցության տեմպերը դեռևս չեն արտացոլոււմ առկա պոտենցիալը:
Միաժամանակ երկու երկրների ղեկավարները վստահություն են հայտնել, որ ստորագրված փաստաթղթերն ու Բուդապեշտում բացվող հայ-հունգարական գործարար համաժողովը նոր լիցք կհաղորդեն գործարար շփումների ակտիվացմանը և համաշխարհային ֆինանսատնտեսական ճգնաժամի հաղթահարմանը զուգահեռ կնպաստեն Հայաստանի ու Հունգարիայի միջև առևտրաշրջանառության ծավալների աճին:
Սարգսյանն ու Շոյոմը կարևորել են պետական տարբեր մարմինների ու գերատեսչությունների, ինչպես նաև Հայաստանի ու Հունգարիայի տարբեր քաղաքների միջև ուղիղ համագործակցության հետագա զարգացումը:
Բացի այդ, երկու պետությունների ղեկավարները կարևորել են երկու երկրների միջև գործակցության հետագա խորացումը ինչպես միջազգային կազմակերպությունների, այնպես էլ բազմակողմ այլ ձևաչափերում, մասնավորապես, Եվրամիության Արևելյան քաղաքականության շրջանակում:
Սերժ Սարգսյանը նշել է, որ Հայաստանը, որպես առաաջնահերթություն, կարևորում է իր քաղաքականության եվրոպական ուղղությունը և Արևելյան գործընկերության քաղաքականությունը դիտում է որպես նոր հնարավորություն` խորացնելու իր հարաբերությունները ինչպես Եվրամիության, այնպես էլ ԵՄ-ի անդամ առանձին երկրների հետ:
Շոյոմը նշել է, որ իր երկիրը ուշիուշով հետևում է Եվրոպական նոր հարևանության քաղաքականության և Արևելյան գործընկերության շրջանակում Հայաստանի գործողությունների ծրագրի ու այդ համատեքստում իրականացվող բարեփոխումների առաջընթացին:
Նա ընդգծել է, որ 2011 թ. Եվրամիությունում իր նախագահության ընթացքում Արևելյան քաղաքականությունը լինելու է Հունգարիայի առաջնահերթություններից մեկը: -0-
