Հայ փորձագետը չի բացառում մինչև դեկտեմբեր Թուրքիայի կողմից հայ-թուրքական արձանագրությունների վավերացման հնարավորությունը

ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը չի բացառում մինչև 2009թ.-ի դեկտեմբեր Թուրքիայի կողմից հայ-թուրքական արձանագրությունների վավերացման հնարավորությունը:

«Բացառված չէ, որ Թուրքիան վավերացնի արձանագրությունները մինչև դեկտեմբեր», - ուրբաթ լրագրողներին ասաց Սաֆրաստյանը՝ այդ ամենը պայմանավորելով դեկտեմբերին կայանալիք Թուրքիայի և ԵՄ-ի ներկայացուցիչների հանդիպմամբ, որի նպատակը Եվրամիությունում այդ երկրի անդամակցության հարցն է:

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

Սաֆրաստյանի խոսքերով, թուրքական ղեկավարության մոտ դժվարությամբ, սակայն ձևավորվում է արձանագրությունների վավերացման գործընթացի արագացման մոտեցումը:

Միաժամանակ փորձագետը չի բացառում նաև այն, որ Թուրքիայի կողմից արձանագրությունների վավերացումը արհեստական բնույթ է կրելու:

«Հայաստանի վրա ճնշում գործադրելու նպատակով արձանագրությունները կարող են վավերացվել, սակայն տեխնիկական պատճառներով Թուրքիան կարող է ձգձգել սահմանի բացումը», - պարզաբանեց Սաֆրաստյանը:

Բացի այդ նա նշեց, որ Թուրքիան բարդ ընտրության առջև է կանգնած: «Եթե չլուծվի ղարաբաղյան խնդիրը, ապա սահմանը չի բացվի, սակայն եթե սահմանը չբացվի, ապա ԱՄՆ Կոնգրեսը կընդունի Հայոց ցեղասպանությունը դատապարտող բանաձևը», - ասաց Սաֆրաստյանը՝ նշելով, որ Թուրքիայի վերնախավը գտնվում է այդ չփոխկապակցված խնդիրների ճնշման տակ:

Այս կապակցությամբ Սաֆրաստյանի խոսքերով, Թուրքիան ձգտելու է, որպեսզի հայ-թուրքական հարաբերությունների կարգավորումը չվնասի թուրք-ադրբեջանական հարաբերությունները:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ -0-