Հայաստանում 2009թ.-ին թմրանյութերի հետ կապված հանցագործությունների աճը կազմել է 65 տոկոս. Ոստիկանություն

2009թ.-ի ինը ամսվա ընթացքում Հայաստանում 65 տոկոսով ավելացել է թմրանյութերի հետ կապված հանցագործությունների թիվը՝ կազմելով 826 հանցագործություն՝ 2008թ.-ի 549-ի փոխարեն, երեքշաբթի լրագրողներին տեղեկացրեց Կազմակերպված հանցավորության դեմ պայքարի գլխավոր վարչության պետ, գնդապետ Հունան Պողոսյանը:

Նա նշեց, որ 826 հանցագործությունից 448-ը կամ 54,3 տոկոսը բաժին է ընկնում Երևանին:

«Ողջ համաշխարհային հանրությունը, այդ թվում նաև ՄԱԿ-ը խորը մտահոգություն են արտահայտում թմրանյութերի և հոգեմետ միջոցների արտադրության և շրջանառության արագ աճի կապակցությամբ: Այդ պատճառով Ոստիկանության գլխավոր խնդիրներից մեկն այս վտանգավոր երևույթի դեմ պայքարը պատշաճ մակարդակով կազմակերպելն է», - հայտարարեց Պողոսյանը:

ԿՀՊԳՎ-ի պետը տեղեկացրեց, որ թմրամիջոցների ապօրինի շրջանառության դեմ պայքարի շրջանակներում 2009թ.-ին առգրավվել է 28 490 գրամ թմրադեղ՝ 2008թ.-ի 20 034 գրամի դիմաց:

Պողոսյանը նաև նշեց, որ ԵԱՀԿ անդամ-երկրների թմրամիջոցների ապօրինի շրջանառության դեմ պայքարի լիազորված մարմինների համակարգող խորհրդի միջոցառումների ծրագրի համաձայն՝ սեպտեմբերի 28-ին անցկացվել է «Կանալ-2009» օպերատիվ-համալիր միջոցառումների առաջին փուլը, որի նպատակն էր կանխել մաքսանենգության ներթափանցումն աֆղանական ափիոնի, կոկաինի և սինթետիկ թմրադեղերի միջոցով եվրասիական տարածաշրջան, հոգեմետ միջոցներով՝ Կենտրոնական Ասիա և Աֆղանստան, ինչպես նաև կանխել թմրամիջոցների ապօրինի շրջանառության արդյունքում ստացված ֆինանսական միջոցների լվացումը:

«Կանալ-2009» օպերացիայի արդյունքում բացահայտվել է թմրանյութերի հետ կապված 19 հանցագործություն, 23 մարդ ենթարկվել է քրեական պատասխանատվության, ինչպես նաև ընդհանուր առմամբ առգրավվել է 567 գրամ տարբեր տեսակի թմրադեղ:

Բացի այդ, օգոստոսի 20-ից մինչև սեպտեմբերի 18-ը ողջ տարածքում անցկացվել է «Կանեփ-կակաչ 2009» օպերատիվ-կանխարգելիչ միջոցառումը, որի ժամանակ հայտնաբերվել և ոչնչացվել է 105,5 տոնա վայրի կանեփ և 72 կգ կակաչ:

Նա ավելացրեց, որ չնայած իրականացված աշխատանքի զգալի ծավալին՝ թմրանյութերի դեմ պայքարն անհրաժեշտ է ավելի կատարելագործել՝ հաշվի առնելով դրանց վտանգավոր լինելը:-0-