Ոստիկանության՝ Կոտայքի մարզային վարչության օպերլիազորը մեղադրվում է պաշտոնական լիազորությունները չարաշահելու և կաշառք շորթելու մեջ
Հատուկ քննչական ծառայությունում ավարտվել է ոստիկանության՝ Կոտայքի մարզային վարչության ՔՀԲ օպերլիազոր, ոստիկանության կապիտան Մ. Յախանյանի նկատմամբ հարուցված քրեական գործի նախաքննությունը, տեղեկացնում է Հայաստանի գլխավոր դատախազության մամուլի ծառայությունը։
Յախանյանը մեղադրվում է իր լիազորություններն անցնելու և քաղաքացիներ Ա. Իգնատենկոյից և Մ. Մկոյանից շորթմամբ 1500 ԱՄՆ դոլարի չափով կաշառք ստանալու մեջ՝ մարմնավաճառներ Մ.Պողոսյանին և Գ.Բաբայանին բռնաբարության փաստով քրեական գործ չհարուցելու համար։
Նախաքննությամբ ձեռք բերված ապացույցների հիման վրա Յախանյանին մեղադրանք է առաջադրվել ՀՀ Քրեական օրենսգրքի 309-րդ հոդվածի առաջին մասով և 311-րդ հոդվածի երրորդ մասի առաջին և երրորդ կետերով։
Քրեական գործն ուղարկվել է Կոտայքի ընդհանուր իրավասության դատարան։ -0-
