ԵՐԵՎԱՆ, 14 հոկտեմբերի. /Նովոստի-Արմենիա/. Հայտնի ռեժիսոր և սցենարիստ Կարեն Շահնազարովի «Թիվ 6 հիվանդասենյակը» ֆիլմի պրեմիերան կանցկացվի Երևանում, մանկապատանեկան ֆիլմերի հինգերորդ փառատոնի շրջանակներում: Փառատոնը կազմակերպվել է Ռոլան Բիկովի անվան հիմնադրամի նախաձեռնությամբ:
«Փառատոնի հոբելյանական ծրագիրն այս տարի բավականին բազմազան է ու հագեցած հայրենական և արտասահմանցի ռեժիսորների ու մուլտիպլիկատորների պրեմիերաներով»,- չորեքշաբթի լրագրողներին հայտնեց փառատոնի տնօրեն Նունե Մանուկյանը:
Նրա խոսքով «Թիվ 1 հիվանդասենյակը» ֆիլմից բացի փառատոնի շրջանակներում կկայանա ևս երկու պրեմիերա՝ Բորիս Գրաչևսկու առաջինը լիամետրաժ «Տանիք» ֆիլմը, ինչպես նաև ռեժիսոր Նիկոլայ Դենիսովի «Արկածները Դիկանկայի մոտ գտնվող ագարակում»: Երկու ռեժիսորներն էլ անձամբ ներկա կլինեն իրենց ֆիլմերի պրեմիերաներին:
Մանուկյանը հայտնեց նաև, որ փառատոնի պատվավոր հյուրը կլինի հայտնի լրագրող և հեռուստահաղորդավար Ալեքսանդր Գորդոնը, ով ցանկացել է երևանցի հանդիսատեսին ներկայացնել իր նոր ֆիլմը:
Փառատոնին մասնակցելու նպատակով այդ օրերին Հայաստան կժամանեն մշակույթի անվանի գործիչներ՝ ռեժիսոր, սցենարիստ, պրոդյուսեր, ՌԴ ժողովրդական գործիչ, «Մոսֆիլմ» կինոստուդիայի գլխավոր տնօրեն և վարչության նախագահ Կարեն Շահնազարովը, Երեխաների և պատանիների համար կինոյի և հեռուստատեսության զարգացման «Ռոլան Բիկով» հիմնադրամի նախագահ, ՌԴ արվեստի վաստակավոր գործիչ, ՀՀ արվեստի վաստակավոր գործիչ, Երևանում մանկապատանեկան ֆիլմերի միջազգային փառատոնի պատվավոր նախագահ Արմեն Մեդվեդևը, ԽՍՀՄ ժողովրդական դերասանուհի, ԽՍՀՄ պետական մրցանակի դափնեկիր Նատալյա Բելոխվոստիկովան, ՈԴ արվեստի վաստակավոր գործիչ, դաշնակահար Լևոն Օգանեզովը, «Երալաշ» մանկական կինոհանդեսի գեղարվեստական ղեկավար, ՌԴ արվեստի վաստակավոր գործիչ Բորիս Գրաչևսկին, ԽՍՀՄ ժողովրդական դերասան Վլադիմիր Նաումովը, ռեժիսոր, սցենարիստ և դերասան Տիգրան Քեոսայանը, պրոդյուսեր, ռեժիսոր, սցենարիստ , «GOLD VISION» գործակալության գլխավոր տնօրեն Դավիթ Քեոսայանը և արվեստի մի շարք անվանի գործիչներ, որոնք մեծ դերակատարում են ունեցել համաշխարհային կինեմատոգրաֆիայի զարգացման գործում: Փառատոնի շրջանակում կներկայացվի 65 ֆիլմ 27 երկրից:
Հանրահայտ հյուրերի մասնակցությամբ փառատոնի շրջանակներում կկազմակերպվեն վարպետության դասընթացներ, կանցկացվեն հանդիպումներ մայրաքաղաքի և շրջանների դպրոցների սովորողների հետ:
Ինչպես հայտնեց Մանուկյանը, փառատոնը կբացի հանգուցյալ հայ մուլտիպլիկատոր Ռոբերտ Սահակյանցի վերջին աշխատանքներից մեկը:
«Քանի որ սա մանկապատանեկան ֆիլմերի փառատոն է, մեզ համար շատ կարևոր է իմանալ հենց իրենց՝ երեխաների ընտրությունն ու կարծիքը, ինչի կապակցությամբ որոշվել է երկու ժյուրի ձևավորել՝ մանկական և պրոֆեսիոնալ, որոնք առանձին-առանձին կընտրեն լավագույն լիամետրաժ ֆիլմն ու լավագույն անիմացիոն աշխատանքը»,- հայտնեց Մանուկյանը:
Նա հայտնեց նաև, որ այս տարի առաջին անգամ հիմնադրվել է ևս մեկ անվանակարգ «Հանդիսատեսի համակրանքի մրցանակ», որը կհանձնի մանկական ժյուրին: -0-
