Թուրքիայի տարածքով չորրորդ օպտիկամանրաթելային կապի անցկացումը էականորեն կբարձրացնի Հայաստանի տեղեկատվական անվտանգության մակարդակը

Թուրքիայի տարածքով չորրորդ օպտիկամանրաթելային կապի անցկացումը էականորեն կբարձրացնի Հայաստանի տեղեկատվական անվտանգության մակարդակը, չորեքշաբթի «Նովոստի» միջազգային մամուլի կենտրոնում լրագրողնրին ասաց Տեղեկատվական տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը:

Նրա խոսքերով՝ չնայած այս պահին այդ ոլորտում որևէ կոնկրետ պայմանավորվածություններ չկան, իսկ «ԱրմենՏել» հեռահաղորդակցական ընկերության և թուրքական փրովայդերների միջև բանակցությունները ժամանակավորապես սառեցված են, այնուամենայնիվ, հայկական շուկայի բոլոր խոշոր խաղացողները փնտրում են դեպի Հայաստան չորրորդ օպտիկամանրաթելային մալուխի անցկացման հնարավորությունները:

Ավելի վաղ «ԱրմենՏել» ընկերությունը հայտարարում էր օպտիկամանրաթելային մալուխի անցկացման վերաբերյալ Turkish Telecom թուրքական ընկերության հետ պայմանագիր կնքելու մտադրության մասին:

Ինտերնետ կապի ապահովման նպատակով ընկերությունները համապատասխան թույլտվություն էին ստացել Թուրքիայի միջոցով ինտերնետի միջազգային ելքի ուղու  ստեղծման համար: Սակայն հետագայում բանակցությունները սառեցվեցին:

«Տեխնիկական տեսակետից այս հարցում լուրջ խնդիրներ չկան, և կարծում եմ, որ հայ-թուրքական սահմանի բացումից հետո այս հարցը կարող է լուծվել կարճ ժամկետներում», - ասաց Վարդանյանը:

Հայաստանում այսօրվա դրությամբ գործում է մեծածախ ինտերնետի երկու օպերատոր: Առաջինը «ԱրմենՏել» (ապրանքանիշը՝ Beeline) հեռահաղորդակցական ընկերությունն է, իսկ երկրորդը՝ FiberNet Communications-ը: Հոկտեմբերի 15-ից հայկական շուկա դուրս կգա մեծածախ ինտերնետի ևս մեկ փրովայդեր՝ GNC Alfa ընկերությունը:-0-