Հայաստան-ՆԱՏՕ անհատական գործընկերության գործողությունների ծրագիրն իրականացվում է ժամանակացույցի համաձայն. ՀՀ ԱԱԽ

ԵՐԵՎԱՆ, 5 հոկտեմբերի. /Նովոստի-Արմենիա/. Հայաստան-ՆԱՏՕ անհատական գործընկերության գործողությունների ծրագիրը կատարվում է համաձայն ժամանակացույցի:

Սա երկուշաբթի իր նիստի ժամանակ ամրագրել է Հայաստան-ՆԱՏՕ անհատական գործընկերության գործողությունների ծրագրի կատարման միջգերատեսչական հանձնաժողովը, որը վարել է Ազգային անվտանգության խորհրդի քարտուղար Արթուր Բաղդասարյանը, «Նովոստի-Արմենիա» գործակալությանը հայտնել է ՀՀ ԱԱԽ քարտուղարի մամուլի ծառայությունը:

Գործողությունների ծրագրի նպատակը եվրոպական և եվրատլանտյան կառույցների ու հաստատությունների հետ Հայաստանի համագործակցության խորացումն է:

Ծրագրով նախատեսված 42 միջոցառումներն ընդգրկում են 122 գործողություն, որոնցից 84-ն արդեն կատարված են:

Արթուր Բաղդասարյանը կարևորել է ծրագրով նախատեսված սահմանային անվտանգության և ահաբեկչության, կազմակերպված հանցավորության և կիբեր հանցագործությունների դեմ պայքարի կատարելագործման, անհրաժեշտ ծրագրերի և միջոցառումների կազմման և համակարգված միջգերատեսչական համագործակցություն իրականացնելու հարցերը, որոնց կապակցությամբ ընդունվել են համապատասխան որոշումներ:

Ազգային տեղեկատվական ռազմավարության և քաղաքացիական պաշտպանության ազգային հայեցակարգի նախագծեր մշակելու համար հանձնաժողովի որոշմամբ ստեղծվել են աշխատանքային խմբեր:

Հանձնաժողովի հաջորդ նիստը կգումարվի 2010 թվականի հունվարին` ամփոփելու 2009 թվականին կատարված աշխատանքը:-0-